隻身追「港」電影夢 倪晨曦無悔

2005年多倫多華姐冠軍倪晨曦，兩年前咬緊牙關來港捱世界。離開父母的掌心，半年內搬四次屋，全副身家只有兩箱行李，Elva至今仍歷歷在目，為的就是追逐一個電影夢。

新一代宅男女神苟芸慧（苟姑娘）身邊亦有一位「女神」，她叫倪晨曦（Elva）。2005年在多倫多參加華裔小姐奪冠的Elva，當時年僅18歲，她抱着學習的態度參賽。2006年她再戰國際華姐，當時已獲現在的經理人公司寰宇垂青，她認真考慮後，決定來港闖一闖。

難敵思鄉淚流

外表弱不禁風的Elva，骨子裏卻十分堅強。她咬緊牙關，拖着兩篋行李來港，最初半年實在不好受：「半年搬咗四次屋，住嘅都係又細又污糟嘅賓館，成副身家得兩個篋，其實幾難捱，父母當我寶貝女，依家喺香港靠自己，諗起加拿大生活同依家比，不期然就會喊。」Elva還有一位感情深厚的孖生妹妹，但如今離開摯親，她無怨無悔：「初初媽咪好擔心，隔一、兩日就打畀我，但條路係自己揀，唔會後悔。今年七月返加拿大探佢哋，臨走時媽咪都有喊。」

與苟姑娘互撐

Elva「捱世界」的生涯跟好友苟姑娘極相似，她倆不時互訴心事，對她們而言，最大難題是學廣東話：「我喺加拿大做過電視台Part Time，同事有教我講廣東話，嚟到香港就要靠自己。我七月返去見番佢哋，佢哋問我點解嚟廣東話冇進步，其實我平時同苟姑娘溝通好少講廣東話。」Elva又替近日是非纏身的苟姑娘難過：「我有叫佢唔開心要出聲，佢條路艱辛過我好多，拍劇廣東話講得唔好，劇組就講啲刻薄嘅說話。我做Model算幸運，待遇都幾好。」

演戲是Elva的夢想，早前她與鄭伊健及蔡卓妍（阿Sa）合演新片《我老公唔生性》，心情緊張：「我都係為咗拍戲先入行！之前有機會同阿Sa合作，可能平時冇乜對住 阿Sa呢啲咁勁嘅對手，真係有壓力，尤其講對白好怕連累佢，喺阿Sa身上學到好多嘢，真係要向佢學習。」

後記：為啖「戲」拒愛

樣貌甜美的Elva怎會沒有追求者？起初入行便傳過黃宗澤（Bosco）對她心動，既已立志闖影圈，思想成熟的Elva亦明言以事業為重，暫時拒愛。而她心中的白馬王子並非型男系，反而是孝順父母的乖乖仔呢！