YoYo被嗌「鄭太」冧爆

蒙嘉慧與鄭伊健明年拉埋天窗，昨日她披露男友求婚過程驚多過喜，方中信更率先稱呼她做「鄭太」，氹得她甜笑道謝。

蒙嘉慧（YoYo）與方中信昨日在無綫電視城內的教堂拍攝新劇《仁心解碼2》，談到與伊健的婚禮，YoYo直言沒有籌備過亦沒有擇日：「可能即興早兩個鐘，叫律師朋友上屋企囉！（着婚紗？）唔會，愈簡單愈好！（拍婚紗照？）睇吓當日個Mood，相片依家都多數喺手機同電腦。（擺酒？）最好唔複雜，盡量唔需要，邊度有位咪擺囉！兩圍有幾難，結婚啫！（度蜜月呢？）得閒可以去個旅行。」

分到三隻貓同貓沙

YoYo坦言結婚是有點為老人家着想：「婆婆同媽咪相繼離開，想趁爸爸健在畀佢知吓，點知我生日同佢講，佢冇反應只係哦咗一聲，好似我一廂情願咁。」

問到求婚過程，她透露伊健在她8月3日生日前求婚：「驚多過喜！婚後幾日後會通知大家，從來冇為結婚急過。」她又否認分伊健身家的報道：「我只係分咗佢三隻貓同貓沙，仲要幫佢哋『畢』屎。」

而方中信以「鄭太」稱呼YoYo，並笑說：「你終於結到婚，適婚年齡嫁得出好開心，遲啲就唔係咁好，戥你哋開心！出年一定要早啲通知大家，大家早啲到。」豈料被YoYo反指他當年結婚亦沒有提早通知，方中信說：「我唔夠錢嘛！擺得嗰兩圍費事啦！你一定要大搞！」