馮曦妤死穴驚舞台

歌手馮曦妤早前獲邀參加內地大型歌唱比賽，雖然未能躋身決賽，但已贏得經驗及友誼。害怕舞台的她，更表示有意到街頭獻唱練膽量！

馮曦妤（Fiona）日前獲邀到上海參加歌唱比賽，雖然於32強止步，但於比賽中獲益良多，她指評判的評語除了令她明白自己的弱點外，亦了解到自己的優勢：「評判話我個弱點係驚個舞台，同時話我其實有實力，點解要驚舞台呢？佢哋咁講，令我知唔應該因為驚而影響發揮！評判仲叫我唔好緊張，要相信自己！」Fiona表示「怕舞台」這個弱點已困擾她一段時間：「一上台聲都震埋，真係好唔抵，所以想去搵唔同嘅途徑表演，累積經驗，亦諗過去街頭唱歌，訓練膽量！」

「對手」助買開聲藥

眼淺的Fiona透露於比賽中喊了無數次：「被淘汰嗰陣，我本來忍住唔喊，但隊友衝出嚟攬住我，令我覺得贏咗肯定同友誼，就係咁忍唔住喊咗成45分鐘！」她透露比賽時因病失聲，幸得其他參賽者幫忙：「其中一位參賽者介紹咗隻開聲藥畀我，仲叫人去買，嗰刻好感動，雖然大家係競爭對手，但都可以無私咁去幫對方。」她又表示於內地參加比賽，有不少驚喜：「呢個平台令大家認識我嘅歌，認識我，發現好多人鍾意我嘅音樂，可以嘗試喺內地發展！」