張名雅四面楚歌愁爆

應屆港姐冠軍張名雅的認受性被質疑，昨日她更慘遭「三面夾擊」，除了遭師姐朱晨麗谷胸搶鏡外，又被網民大起底，而now TV更設一人一票選出真港姐，實行火上加油！

今屆港姐賽果備受爭議，進展更日日新鮮！冠軍張名雅、亞軍黃心穎、季軍朱千雪及最上鏡小姐岑杏賢昨日出席六福珠寶頒獎禮，遭上屆冠軍朱晨麗拋胸及露Bra邊搶鏡，朱晨麗還笑說：「港姐梗係要着靚啲！我係上屆都唔可以輸蝕，要尊重場合！（對自己冇信心？）個個選美都有自信，唔需要咁做（搶鏡）！」應屆三甲則賣口乖，死撐不覺得朱晨麗搶鏡，朱千雪更話中有話：「朱晨麗平時係咁打扮！」

嚇到表弟「逃學」

對於now TV挑戰無綫，宣布舉行「一人一留言，選出真港姐」，可在Facebook或利用now遙控器投選心水港姐，賽果今日公布。張名雅說：「我都聽過，有啲唔開心，決賽嗰晚成件事做得好好，節目有突破，不過觀眾集中最後嗰Part Mistake（錯誤），做唔到一人一票，對工作人員唔公平，應該Focus我哋表現！（一人一票你未必當選？）乜都有可能發生！如果now TV投嘅就可能唔係我攞，但決賽已經係事實，希望觀眾唔好再Focus呢方面，搞到我唔開心！」

除了冠軍資格惹爭議外，張名雅亦遭網民大起底，事緣她與表弟合照竟被誤指為男友，問到是否遭網民針對？她說：「唔知，當選後多人留意！每年港姐有人認同亦有人唔認同，我好介意被起底，亦唔知邊個做，又話我表弟係我男友，仲話佢係『厚唇男』，搞到佢畀同學笑到唔敢返學，行街又畀人認出，影響家人就唔開心！」

朱千雪：好開心

至於黃心穎被問到若再投選，可能三甲不入，她說：「唔會啩？結果都出咗！」而「民意冠軍」朱千雪則說：「一路都好滿意、好開心，已經選定！」另外，三位港姐昨晚出席《慧妍愛心傾城30年》錄影，消息指她們變身「功夫港姐」，將在《星光熠熠耀保良》中表演踩鋼線，有指此舉為港姐補鑊，問到是否相信無綫？張名雅說：「如果我踩鋼線令觀眾留下印象，想挑戰吓！」