泰籍太太否認苛索 劉家輝爆爭產風波

武打明星劉家輝去年中風，當他逐漸康復之際，其第二任太太被指趁病貪財，昨日她接受本報獨家專訪時否認傳聞，並踢爆有人從中作梗，令一對子女未能探望父親。

國際武打明星劉家輝（原名：冼錦熙）憑真功夫打入荷里活，卻遭病魔折磨，去年8月意外跌倒中風致半身不遂的他大受打擊，幸最終慢慢康復。家輝情況理想之際，卻傳出其第二任泰籍太太貪財新聞，有指她教唆子女向患病父親索錢，並欲吞佔劉家輝位於堅道之八百多呎、市值數百萬元之物業。劉太及兒子冼峻龍面對失實報道不再啞忍，昨日接受本報獨家專訪，劉太澄清沒有因病而離棄劉家輝，亦沒有趁病苛索，劉太大爆有人從中作梗，令一對兒女一度未能探望父親。

記：記者　冼：冼峻龍

妻：劉家輝第二任太太

記：話你貪錢，趁劉家輝病攞晒佢啲錢？

妻：冇咁嘅事，我1991年同佢喺香港簽字結婚，生咗一仔一女。生咗個女之後，我哋嘅性格唔係好夾，佢性格比較花弗又鍾意飲酒，我都係靠信仰同畀心機湊大一對仔女，呢個想法嚟維持呢段婚姻。直至09年，家輝話要送個仔去新加坡讀書，我覺得應該一切都重新開始，所以喺劉家輝安排下，我簽咗離婚協議書，當時我同佢講，我願意同佢離婚，但我哋住緊層樓（即堅道物業）要將一半業權轉名畀我大仔冼峻龍，我希望一對仔女有一個保障，之後，我就去咗泰國居住。

記：同劉家輝係咪已正式離婚？

妻：我都唔清楚，我曾經打畀香港嘅律師，佢話劉家輝轉咗律師，所以我都問唔到。

記：劉家輝中風後，你有冇返去睇過佢？有冇問過佢攞錢？

妻：佢中風之後，我即刻喺泰國返香港照顧佢，因為我經濟唔係咁好，返嚟之前，仲同親友借咗二萬蚊做生活費。其實我簽離婚紙嘅時候都冇要求過要一分一毫，點會貪佢嘅錢。只係前年生意周轉不靈，曾經向佢借過30萬，當時家輝係未中風嘅，之後冇同佢講過要錢，亦冇追問堅道層樓轉名嘅問題。

骨肉親情被剝削

記：你今次接受訪問嘅目的？

妻：今年三月，我曾經提出過接家輝去泰國醫病，始終我喺泰國照顧佢會方便啲，點知就由嗰時開始，有人用盡方法阻止我送家輝過嚟，始終我同家輝分開咗，所以我都冇堅持。但上個月底，有人從中作梗，搞到連我個仔同女都探唔到爸爸，再加上有妻離子散、趁病謀財嘅消息傳出，我覺得真係需要出嚟講清楚一切！今次第一係想澄清不實報道，第二係希望啲仔女能夠探爸爸，仔女見父親係好正常嘅事，呢啲骨肉親情，冇得剝削。至於邊個從中作梗為存厚道，我唔想多講，只係想對仔女能夠見到爸爸。

記：由幾時開始探唔到劉家輝？

冼：自從三月起，媽媽提出過接爸爸去泰國醫病之後。親友之間有好多奇怪嘅傳聞，上月底我爸爸由太子居所轉去護老院住，都冇人通知我。我用咗好多方法先知爸爸住喺邊，我想去探佢，但喺門口已經被護士截住，話爸爸唔想見人，我唔知發生乜嘢事，我都只係好想探爸爸，好想知道爸爸依家嘅情況。

兒子生活費五千

記：依家經濟情況有冇問題？

冼：自從去年爸爸中風之後，我決定完成咗中七學業就停學一年，諗住留喺香港照顧父親同妹妹，雖然父親透過經理人每個月畀五千蚊作我哋兄妹嘅生活費，我依家仲搵咗一份侍應工作，生活暫時冇問題。

記：劉家輝一向好錫一對仔女？

妻：佢好錫對仔女，可以話要乜有乜，每星期日又會帶佢哋出去飲茶行街，佢哋生日會搞好大型嘅生日派對，為嘅都係氹一對子女開心。