Naomi幻想嫁霆鋒

李思捷緋聞女友馮鎵瀠（Naomi）最愛謝霆鋒，夢想成為謝太。現實中，她卻與李思捷傳緋聞，並背負「小三」之名，Naomi慨嘆此「名銜」令她受傷，更強調與李思捷一直是朋友關係，但報道出街後，就不知道對方是否還當她朋友，似乎受盡委屈！

穿脷環、臍環和乳環的Naomi，自覺很型，故擇偶條件都要型：「靚唔靚仔冇所謂，最緊要有才華，識氹人開心，覺得開心最重要，最想搵嘅男朋友係謝霆鋒，個人好好，做戲又好，係我心目中最完美嘅男人！」原來Naomi是霆鋒狂迷，更試過為對方流淚：「佢結婚我喊咗三日三夜，睇電視知呢個消息時，我喺台灣食緊蚵仔麵線，我喊到嘔番晒出嚟！接受唔到我最鍾意嘅男仔結婚。」現時霆鋒已回復單身，難怪Naomi笑稱要做謝太，更不介意做Lucas及Quintus繼母。

鍾情鷹勾鼻

由於太愛霆鋒，Naomi竟愛上擁有勾鼻的男生：「我有幾任男友都有鷹勾鼻，霆鋒都有，只要有嘅男仔，我都會加到80分。」但偏偏現實中卻與沒有勾鼻的李思捷傳出緋聞，更被指介入他和王宝宝（春卷）的戀情，對此Naomi高呼委屈：「我冇做小三呀！由頭到尾我都當我哋係朋友，可能報道出到嚟渲染咗啦！我覺得我好委屈囉，小三呢個位冇人會想做，事件後我不停畀網民抨擊同鬧，叫我去死，咩核突字眼都用晒，我唔係小三，我希望Fans支持佢偶像之餘，都可以理智啲。但到今時今日，我唔知對方仲當唔當我係朋友，我唔想再有負面報道傷害任何一方。」

Naomi坦言不想多講這段緋聞：「唔想令佢（思捷）唔舒服，唔想佢唔開心，因為佢快樂所以我快樂！」至於會否致電其女友春卷解釋，Naomi則表示不認識對方：「唔知佢女友係邊個，佢都冇講過有女朋友，佢話佢哋Close Friend咋嘛，如果令佢Close Friend唔開心，我都想講句對唔住，因為我覺得嗰個女仔（春卷）係好女仔，係200分女友，希望佢快啲出番嚟做嘢！咁我哋就有機會識到大家，我可以好好向佢學習，同埋講唔好意思。」

Profile

姓名：馮鎵瀠（Naomi）

出生日期：12月27日

身高：1米68

體重：46kg

星座：山羊座

血型：A型

興趣：主持、戲劇、唱歌

入行經過：16歲參加雜誌型仔型女大賽，18歲拍攝第一個廣告，入行後曾到台灣發展。