羅力威漸悟 鄭融進化

歌手有性格能令人留下深刻印象，惟過分「有性格」，會被冠上「黑面」、「寸爆」及「唔合作」等負面形容詞。鄭融和羅力威同樣曾因太有性格出事，幸經一事長一智，兩人EQ已經提升！。

憑在《亞洲星光大道》摘冠而闖樂壇的羅力威，甫出道即被指未紅先驕，又試過黑面翹手受訪，結果被冠以「黑面神」稱號。經過在樂壇逾兩年的洗禮，加上半年前加入英皇，羅力威已逐漸適應娛樂圈生活：「如果仲未適應，呢個人都真係太慢。（情緒化？）只係多愁善感，我唔可以畀情緒影響工作。」問到性格是否適合加入樂壇？他說：「樂壇包容到唔同嘅人，冇理由包容唔到我，每人性格唔同，但可以改善，即係怕醜變開朗、抑鬱變樂觀。」

避談雨僑

問到現時心情是否開朗？他笑說：「開朗嘅，因為訪問喺夏天，我出道時屬於冬天，會多愁善感啲，冬天要留住啖氣暖胃。（黑面？）我承認曾經唔識大體，呢行畀好多唔同經驗我吸收，依家講嘢圓滑咗。（檢討？）好彩身邊有同事開導我。（講笑？）我OK嘅，搞Gag就睇情況。（唔識笑？）影相要Chok吓扮吓嘢。（EQ高？）都係睇天氣，會慢慢調整。」惟話題觸及緋聞女友雨僑（前名：羽翹）時，羅力威婉拒作答，但至少沒有變臉。

宅男夜蒲？

羅力威的同名專輯已經面世，音樂在他心目中是其中一種抒發情感方式，靈感來自家人及朋友。問到終日埋首音樂創作的他，會否變全職宅男？他說：「我唔蒲，算比較宅，但如果以後畀人影到蒲，唔好話我講大話。」至於有否留意今年樂壇新人，包括林德信、胡鴻鈞及「星光幫」的亢帥克等？他說：「有。（攞獎？）我想攞唱作歌手獎項，每年都有新人，就算攞唔到新人獎唔代表失敗。攞到獎會送畀公司同事，冇嘅話希望佢哋唔好灰心。」談到對歌唱比賽的看法，他說：「我覺得要講時機、緣分、運氣，當然最重要係努力。」

後記：長「幸」哥

羅力威自言是幸運歌手，他試過未出碟便以新人姿態角逐叱咤男歌手及歌曲獎，早前又一連舉行五場音樂會，問到一切是否來得太快？他說：「我想追番以前嘅進度，因為之前冇出碟，要追番步伐。好開心舉行咗五場騷，係一個好好磨練。」

入行9年的樂壇小野貓鄭融，因言行直率惹來不少是非，被指「唔聽話」、「黑面」及「爆粗鬧女主播」等。事過境遷，鄭融坦言過往太「細路女」，沒有顧全大局，經一事長一智，她自覺已有所改善：「最近突然開竅，檢討工作同待人接物態度。我之前會以『小朋友』方法處理，但近來知道要變，遲就遲咗啲，但至少諗通咗。其實唔同階段都要有堅持同執着，不過我會篩選，最緊要唔影響大局。」原來她擔心輕易妥協會失去自我：「但依家個人『進化』咗，做嘢都開心啲。」

愛得輕鬆

入行至今受盡負面新聞抨擊，問到EQ有否提升？鄭融說：「以前真係細路女得好緊要，當有報道寫自己，或者只係講兩講，我都會好唔開心，會黑面。依家學識唔好太執着，有啲嘢唔係真嘅就唔係真。有啲嘢人哋覺得我做得唔夠好，我會再做好啲，證明畀人睇我做得好，唔係好似以前咁，畀人講兩句，我就話：『算啦！我係咁差o架』，然後放棄。」鄭融入行至今戀情不多，除了與劉浩龍拍拖多年，繼而戀上音樂人莊冬昕，至近日她與老外新歡拍拖夜蒲，僅此而已。原來公開戀情反而令她變得輕鬆，她說：「所有嘢坦誠表達最舒服，仲可以畀機會人哋了解你。以前細路女犯過錯，依家先覺得做錯，對某啲人唔好意思。（同男友感情穩唔穩定？）OK呀！多謝關心。（結婚？）冇諗過唔會，只係未知幾時，現階段想投入工作。（男友詐型？）都OK嘅，等我得閒關心吓佢感受先！」

老友鬼鬼

她又表示新專輯《EVO》與進化有關：「錄呢張唱片時諗好多嘢，識得平衡。我呢排學煮健康餐同朋友、粉絲分享，真係健康咗。」提到好姊妹薛凱琪，她說：「我哋有好多機會接觸，（樂壇中同佢最Friend？）都係，成日傾偈，而且識分私事同公事。不過我圈外朋友較多，同中學朋友仲有聯絡。」

後記：紅館夢

一向「直不甩」的鄭融性格有改善，兼且最近戀情有着落，但她坦言最渴望實現紅館夢：「自己好想喺紅館開騷，依家會做好啲音樂，報答支持自己嘅樂迷，唔想令大家失望。」看來「細路女」已日漸成熟，步向「愛情事業兩得意」的階段！