黃貫中無懼「失聰」

數香港Band Sound代表，Beyond當之無愧，Beyond 1983年成立，黃貫中1985年加入，及至2005年解散。20年裏，他經歷無憾的友情歲月。繼續向前，Paul無悔聽覺漸失，因真正的音樂在心中。

口述：黃貫中　筆錄：專案組

成日都傳我同家強唔啱Key，所以Beyond要散Band，其實我哋幾個由細玩到大，識咗30年，大家都好了解對方，彼此都可以用最率直同坦誠嗰面相處，我哋之間唔使門面說話，或者咁樣會令外界覺得我哋幾個互相唔妥。咁又點？我唔會為咗令外界覺得我哋好Friend而講嘢變得客氣，太虛偽！其實散Band真係想各自發展，Beyond留喺大家回憶，講真，如果我哋真係反晒面，嬲極咪最多唔見，唔使講到出口話散Band？散Band唔代表反面，就算我哋幾耐冇見，依然好了解對方，外人係冇辦法明白，呢啲係男人同男人之間嘅友誼！

舊歌賣得心情矛盾

分開之後，我哋都各自喺音樂上有自己嘅生活，無論Beyond明年開騷，係為咗重組紀念，抑或紀念家駒走咗廿周年，我嘅立場都係被動，搞得成，我實去到盡！我哋三個都好明白，可唔可以再一齊開騷好講緣分、講Timing，好多外圍因素。呢十年，我哋三個都好避忌拉埋Beyond個名搵錢，雖然經常，尤其係內地搞騷嗰啲主辦單位經常借意提及Beyond，我哋都好無奈。有時見到啲舊歌又賣得，心情好矛盾，隊Band仲咁紅，我與有榮焉，但點解仲停喺舊作？

無論向「前」看，還是向「錢」看，每個人價值觀都唔同，我重視嘅係「無悔」。就好似我右耳嘅聽覺出現問題，並唔係一朝一夕，有邊個Band仔隻耳冇事？就連歌手都會因為走埠登台，成日近距離企喺喇叭旁，聲帶同聽覺都好多問題，係「職業病」。無可否認，近年我嘅病情漸趨嚴重，多咗啲音頻聽唔到，尤其用氣聲講嘢我實聽唔到，日常生活仍然OK。雖然係會影響Tune結他，但我Tune咗咁多年，憑感覺多過聽覺，真正嘅音樂在心中。我唔會戴耳塞夾Band，好冇癮啫！如同為免手指起繭而戴手套彈結他一樣，多X餘！（全文完）