JJ眼濕濕「佢冇嘢呃我！」

與樊少皇相戀的賈曉晨（JJ）近日備受輿論壓力，繼日前澄清被指小三的報道時聲淚俱下後，昨日又眼濕濕回應戀情，力撐男友未有對她隱瞞：「佢冇嘢呃我！」

早前本報率先披露「樊J戀」，日前又有消息指男方早有家室，令JJ慘變小三。JJ於昨午四時許，在4名助手陪同下現身灣仔出席活動，她受訪時忍不住眼濕濕澄清：「可能大家對我講嘅嘢有啲誤會，我從來冇講過佢冇同我講呢件事（指有子女），我只係等佢發聲明先回應。」又稱最介意被指小三：「以我所知佢冇結婚，而且係好耐之前嘅感情，我考慮同包容緊呢件事。」

承認於1個月前發展戀情的JJ，以「每個人都有過去」維護男友：「愛一個人應該包容對方嘅過去，報道（指其為「小三」）一出嚟，我都好想知咩事。（幾時知佢有仔女？）我哋交往之前佢都有講。（繼續發展？）我拍拖要有將來，我希望結婚生仔，唔希望有任何唔清楚嘅嘢令到我嘅親人、朋友同自己難受。（唔再信佢？）佢冇嘢呃我！以我了解，我係同一個有過去嘅人拍拖，所以我會嘗試繼續包容佢！」

舊愛沈震軒安慰

JJ又自我安慰：「最緊要係將來！（佢有冇搵你？）有，佢睇到雜誌都唔開心，佢將件事收埋咁多年，佢嘅壓力同痛苦我都明。」而JJ舊愛沈震軒昨日宣傳劇集時表示有安慰對方：「人哋啱啱開始，唔好搞破壞啦！希望JJ可以堅強啲。」而樊少皇昨日亦於微博安慰女友，表示會尊重她的所有決定。