港姐連環染疱疹

港姐爆發疱疹恐慌！大熱佳麗陳潔玲與曾明俐疑因共用唇彩而雙雙「爛嘴」生唇瘡，趕不及痊愈的陳潔玲，後日極有可能「爛住嘴」與另一大熱門湯洛雯爭冠軍，認真輸蝕！

應屆《香港小姐競選決賽》將於後日舉行，10位候選佳麗昨日身穿便服出席記者會，一直被視為大熱的「瘡版陳妍希」陳潔玲竟於賽前「爛嘴」，下唇驚現疱疹徵狀！她踢爆無綫化妝品不乾淨所致：「最近忙綵排，加上唔夠瞓，所以抵抗力變差，可能因為啲化妝品唔乾淨，又要同其他佳麗Share，所以先搞成咁！曾明俐都有生唇瘡！公司之後落Order，要用番自己嘅唇彩！」其實歷屆港姐向來習慣共用化妝品，惟今年爆發交叉感染，造成疱疹恐慌！陳潔玲無奈要以一張「爛嘴」力撼同是大熱的湯洛雯及張名雅的「靚嘴」，確是輸蝕！

至於被爆生唇瘡的曾明俐昨日回復「靚嘴」，她說：「好番晒啦！之前喺錄影廠冷氣好凍，所以有啲『爆坼』啫！（狀態如何？）有信心，但都有啲緊張！（比賽當日男友到場？）男朋友唔會由外國返嚟，但每日都有講電話，佢好支持我！（送禮物畀你？）冇諗到咁長遠，最緊要有心，總之平常心啦！一步一步嚟，唔想畀自己太大壓力！」她在早前舉行的淘汰賽中表現不俗，成為大熱之一，問到會否視成功收身的朱千雪為重大威脅，她說：「唔會咁諗，每位佳麗都有佢哋嘅特質，邊個攞冠軍都有佢嘅原因！」

崔建邦拒合照

雖然陳潔玲被疱疹搞到花容「失色」，卻無損桃花運，有指崔建邦向她展開追求攻勢！問到崔建邦是否照顧有加，她即「落閘」指對方並非她那杯茶：「佢對個個都好好，有啲佳麗喺外國返嚟，佢都會教佢哋唔好講懶音！（對佢有Feel？）冇Feel！佢係個出色嘅主持，但唔係我鍾意嘅類型！」而擔任司儀的崔建邦亦指緋聞是「天方夜譚」，並耍手擰頭拒絕與陳潔玲合照。問到睇好哪位佳麗，他以一貫官腔表示「個個都好」，只說：「朱千雪、岑杏賢同李渼琦嘅口才都進步咗好多！」