陳嘉桓林峯過去咗

陳嘉桓出席活動時表示沒有追求者，坦承身材不夠豐滿的她認為感情事不能心急，談到與林峯的緋聞時，她說：「過去咗」。

陳嘉桓（Rose）昨日以三皇集團的「當糖輕．當堂瘦」代言人身份出席活動，一身黑色喱士花裙打扮，透出優美身段，吸引不少途人圍觀。她與現場人士大玩遊戲，場面熱鬧。

Rose表示早前放假與家人旅行：「我哋一家人去咗泰國旅行三日，我好耐冇試過放假，亦未請過假，喺泰國每日都食嘢同行街，行到攰就做泰式按摩。」她指放假好Relax，更無需化濃妝：「不過天氣麻麻影響心情囉！」問到有否買手信給前緋聞男友林峯時，她反問記者為何要買手信給對方，記者笑指他倆是朋友，她反應頗大地說：「佢咁多朋友唔使送！（佢依家同吳千語傳緋聞係咪覺得甩難？）都過去咗，我覺得每個人工作時都有唔同對手同拍檔，合作過都會有唔同新聞。」

男士喜倒模女性

問到下次旅行會否撇下家人與男友同行時，Rose坦言仍未搵到男友，問到目前有否追求者？Rose說：「冇，唔知……（唔知即係有？）冇呀！」又指現今男士都愛同一類型的女性：「都係眼大、鼻高呢啲類型。（唔係你身材唔夠豐滿咩？）都係囉！感情慢慢嚟，唔急得！」