Paul認衰衝動

歌手黃貫中（Paul）的性格，美其名敢言，老實說衝動，他自知這是優點也是弱點，故不敢從政以免衝動累事！不過，樂壇有事不平即鳴，Paul拒絕為失音歌手「科技整容」欺騙觀眾！

口述：黃貫中　筆錄：專案組

我好鍾意思考，任何事情都可以成為我創作嘅靈感，尤其係政治，好多題材同埋發揮空間。好多人話，香港人政治冷感，但其實近年港人對政治愈嚟愈敏感，除咗遊行示威，近日港人放假唔去主題公園、唔行商場歎冷氣，而係大熱天時一家大細去沙灘執膠珠，令我好感動！又唔係有機構呼籲，更加冇品牌或明星發起，不過啲市民自發去執，而政府又做過啲乜？好值得大家去反思！

「音樂發洩安全啲」

曾經有前輩勸我：「Paul，做明星就唔好講政治，好易賴嘢！」我Band仔一名，怕咩？大家由細睇我大，咁多年嚟唱嘅歌、寫嘢、講嘢都係咁踩界，鬧爆政府都係因為想佢好、想大家好啫！個個都唔敢出聲，個世界就愈嚟愈大鑊！雖然曾經有政黨成員問我入唔入黨？但我拒絕咗，因為我一定坐監！事關我冇政治智慧、太衝動，隨時火遮眼郁手打人，諗落都係用音樂發洩安全啲！

經常有人勸我：「Paul，幾廿歲人化啦！仲咁好火？」所有動力都係源自我嗰團「火」，睇唔過眼我就想開聲鬧，但可以喺邊度發洩？最好就係音樂，唱出嚟！

「唔好唱衰我啲歌」

有時見到啲時下所謂歌手、唱片公司就把幾火，為賺錢塞爆個星嘅檔期，但冇畀時間練歌，有時趕出碟，連歌詞未齊就埋位錄，甚至靠科技Tune，懶音又唔改！如果連外國唱Live同步Tune嘅科技引入香港，即係「假唱」，到時香港樂壇就末日啦！每一項現場表演總有少少瑕疵，但只要出自真心，不完美亦即係獨一無二！「假唱」就係欺騙，可惜連唱片公司或者經理人都唔覺得有問題，啲歌手又點會正視自己嘅問題？我會出聲X，大不了咪用我啲歌，唔好唱衰我寫嘅歌，唔好搞衰個樂壇！（明日待續）