JJ錯愛樊少皇

自本報踢爆39歲的樊少皇與細他10年的賈曉晨（JJ）秘戀後，樊少皇原來有一對子女，更被指是負心漢！身為事件女主角的JJ接受訪問時，呼冤自己被蒙在鼓裏，哭訴自己是受害者之餘，更大呻好辛苦！

武打演員樊少皇原來育有一子一女，不過他最近被本報踢爆秘戀JJ，二人還公然於微博傳情，逐漸揭露彼此關係！身為樊少皇正印的女友佛都有火，向友人吐苦水哭訴暗示遇上負心漢，遺下她及一對仔女。面對萬箭穿心，JJ昨日接受訪問時泣不成聲，為搣甩「小三」之名而盡力解畫，十分慘情！

JJ：賈曉晨　問：主持人

問：乜嘢途徑認識？

JJ：今年3月喺天明婚禮認識，所以都唔係認識一段好長嘅時間。

問：嗰刻對佢有冇好感，或現時為止對佢有冇好感？

JJ：我一路覺得佢係一個好人！

問：「樊少皇太太」話佢好傷心，作為一個女性，你聽到佢咁講感覺係點？

JJ：（激動）我完全接受唔到！如果真係咁樣，我會好辛苦！我覺得成件事唔係咁簡單，我都睇緊發生緊乜事，依家我做乜嘢都冇用㗎！我都好辛苦，我從來都唔想自己係……（抽搐飲泣）我都係一個正常女仔，都好想搵一個好清白嘅男仔，跟住拍拖結婚，其他嘢（愈哭愈崩潰）我真係唔知！

「真係接受唔到」

問：接唔接受到同一個結過婚嘅男士發展？

JJ：如果佢可以搞到好清楚，所有事都清清楚楚的話，我可能接受到，但我今日真係接受唔到囉！

問：因為個關係唔清楚？

JJ：係呀！都係想佢搞清個關係再算。

問：身邊朋友有冇安慰你？

JJ：佢哋都有安慰我，個個都知我係一個乜嘢人，佢哋驚我……（暗示做傻事）所以我都好多謝關心我嘅人，我都係受害者，我都好心痛！

曾經想發展

問：微博上載油畫相引起軒然大波，係咪立即刪除微博？

JJ：我從來冇無啦啦刪除微博，只係我情緒不好，寫傷害自己嘅微博先刪，大家睇我微博嗰啲嘢都冇刪除，從來問心無愧！

問：當時係咪同樊少皇喺一間酒店？

JJ：好多私人嘢我唔講喇！我淨係可以講我同佢係了解中，想有發展，依家出咗咁嘅事，真係接受唔到，想搞清發生乜事，都想佢搞清發生乜事，睇吓將來點樣！

問：想同佢發展？

JJ：係，我唔否認！

雙方Keep住聯絡

問：對方有細路喎！

JJ：其實我所知真係唔比外人多，我都好辛苦！

問：樊少皇有冇聯絡你解釋呢件事？

JJ：其實佢一直有聯絡我，一路都想解釋呢件事，我諗不久將來都會睇到佢聲明！

對於獲樊少皇出聲明力證清白，問到會否與他繼續發展？JJ透過短訊回覆本報：「謝謝！」其他則不作回應。