黃貫中寵物情緣

黃貫中（Paul）與朱茵這段寵物情緣終於開花結果，雖然Paul屢被嘲「窮Band友」，常被揶揄配不起朱茵，其實不住豪宅又冇名車的他「禾稈冚珍珠」，家中養了共值千萬元的西藏獒犬。

我十幾年前因為走失咗隻狗，而同住喺樓下嘅阿茵相識、拍拖。之後我搬入大埔住村屋，養咗幾隻身形龐大嘅西藏獒犬，曾經有人話我為咗啲狗住村屋好傻，有錢都買市區豪宅嚟炒，仲叫我賣咗啲貴狗。講真我連生咗狗BB都唔捨得送畀朋友，又點捨得賣！養藏獒係因為我真係鍾意呢個品種嘅狗，佢哋又惡又大力，但對主人忠心。當日都係因為獒媽媽「寶帝」對阿茵態度有變，唔再用佢百六磅嘅身軀責住阿茵，對佢亦斯文咗好多，估計佢早就Feel到阿茵有BB，真係好有靈性。

扯爛鐵鏈

每日我會花三、四個鐘放狗，每次最多拖兩隻，佢哋仲細個嘅時候，阿茵試過一個人拖兩隻行山，但依家佢有咗BB，加上啲狗太重，一隻都百五磅，為安全起見，我唔會畀佢拖狗。村裏好多人都有養狗，大家有共識，每日下午四、五點就唔放狗，以免同我啲碰面。兩狗見面好易激動，我試過鐵鏈都扯爛，所以會打孖鐵鏈出動。

不過近年「寶帝」年紀大，身重易攰，好多時佢行街行幾步就扭計返屋企，而啲細狗仲搞笑，佢哋因為周身毛好熱，都會扭計開冷氣，佢哋會對住個冷氣吠，一開冷氣就收聲。咁多年嚟，當然試過狗仔離世，骨灰會放喺屋企，有時就攞佢哋留喺度嘅毛出嚟聞，緬懷一下！我經常影狗相放微博，阿茵試過為咗啲狗曝光多過佢而詐型，結果要我放一張阿茵嘅單人靚相上網，先至平息呢場呷醋風波咋！

（明日待續）

口述：黃貫中　筆錄：專案組