Paul冧朱茵天長地久

黃貫中（Paul）今年開騷、結婚和生仔「三喜臨門」，認真夠忙！不過一切都是「意外」，原來黃爸爸本已打定輸數，以為抱孫無望，更曾激到喊！

雖然話一紙婚書唔代表啲咩，但決定結婚嘅人，就應該知結婚係一生一世嘅事。近年有啲人離婚令我好嬲，尤其係當年叫我做伴郎、兄弟嗰啲人，拍咗幾年拖，結婚至話「唔夾」，有啲仲話「冇Feel」要離婚，玩嘢咩？枉我當日衷心祝福佢哋天長地久，離婚嘅朋友個個都畀我鬧！

我曾經幻想阿茵着住白色婚紗喺教堂行禮，點知佢竟然話唔制！因為以前拍戲着過好多次，冇晒感覺，好似開工咁，連婚紗相都唔肯影！所以我計劃2012年搞掂晒手頭上嘅工作，同阿茵放長假環遊世界，即興求婚兼註冊。點知經理人突然搞掂紅館個期，同時阿茵話有咗，同我心裏面個Plan撞晒期。最難搞係阿茵有咗，我啲內地騷又未做晒，成日唔喺香港，又唔可以帶埋佢去，個心仲囉囉攣過當年追佢嗰陣！

激到老竇喊

阿茵有咗，最開心係我老竇。我有兩個細佬，最細嗰個同我一齊夾Band，仲未定性，唔使旨意佢結婚生仔；而我同阿茵雖然認定對方，但早已表明如無意外都唔會結婚生仔，老竇惟有寄望老二。點知老二結婚擺酒嗰晚，喺台上親口講明唔生仔，我老竇抱孫夢成空，當場激到喊！自從阿茵有咗，我老竇最開心，佢依家忙住幫BB改名，不過我想用廣東話，例如「嘅」、「啱」、「咁」，但老竇鬧我玩嘢，唔准我攞佢個孫嚟較飛！（明日待續）