老友黃德斌讚率真 躁底有理

電視台小生黃德斌與Paul相識廿幾年，加上德斌的弟弟是Paul和他那隊Band的髮型師，所以「親上加親」。去年Paul替德斌做男主角的劇集《天與地》創作兼主唱同名主題曲，還有德斌、陳豪和林保怡合唱片尾曲《年少無知》，今年初德斌陪Paul出席頒獎禮，早前又齊齊在紅館合唱《年少無知》。德斌大讚Paul為人，躁底有理：「佢係典型Rock友，性格率直，乜都講得，口講出就係心嗰句，最鍾意佢內外一致，忠於自己，係愛音樂愛藝術嘅人。」

提到「阿嫂」朱茵即將生BB，德斌笑說：「我同Paul係麻甩佬，唔使講咁多門面說話，佢鍾意乜，嚟我舖頭（德斌打本畀女友開的時裝店）攞就得，同佢哋冇計。」最難忘是早前與Paul和陳豪紅館合唱：「可以喺紅館唱歌，我好激動，場面好震撼，我連發夢都冇諗過會喺紅館唱歌。」忙完拍劇的他，希望約Paul到Band房敍舊吹水！對於早前Paul與部分傳媒爭執，德斌認為是對方的私事，不願置評。