苟芸慧開心被追Niki提復合口窒

被指爭做「嘉穎嫂」的周麗淇與苟芸慧，昨日分別宣傳劇集，而嘉穎過氣緋聞女友模特兒徐靖雯亦有出席公開活動，認真巧合！Niki與苟芸慧矢口否認緋聞，但Niki拒絕評論苟芸慧與嘉穎是否合襯，暗露玄機。

無綫「筍盤」小生鄭嘉穎自與佘詩曼分手後，緋聞女友如車輪轉，除過氣的徐靖雯外，最近更被指夾在拍劇咀出愛火花的苟芸慧，以及在婚宴上重逢翻撻的周麗淇（Niki）之間。

巧合的是，三女昨日分別出席活動，Niki與苗僑偉等為新劇《好心作怪》試造型，談及被指與苟芸慧爭做嘉穎嫂時，Niki一度企圖置身事外：「冇回應，集中工作，啲緋聞我都跟唔切。」

她強調與嘉穎私下未有碰面，但拒絕評論對方與苟芸慧是否合襯：「我真係唔知發生乜事，可能大家知我單身，我都冇辦法控制，唔好理囉！」提到很多人期待她與嘉穎復合，Niki更尷尬口窒說：「咁呀……唔知講乜嘢！」未有決絕回應，言語間暗露玄機。

另一邊廂，宣傳《怒火街頭2》的苟芸慧則笑對緋聞：「以前寫我追人，今次終於輪到人哋追我！」

「三角戀」好睇過戲

談到嘉穎被指翻撻Niki，苟芸慧大方指若屬實會送上祝福，並透露這段「三角戀」被指比新劇劇情更吸引：「如果緋聞有助收視，冇乜所謂，戲外我哋冇聯絡，上次見佢係上一次宣傳。」對於被批評鄉音惡頂，她坦言最大敵人是自己，但已漸有進步。

而嘉穎「舊愛」徐靖雯與楊愛瑾出席活動，徐靖雯坦言沒留意嘉穎緋聞：「緋聞真係好難甩，兩年喇！都仲問緊我。問番佢哋啦！（唔再理佢啲事？）唔可以咁講，喺呢件事我都係觀眾。」至於嘉穎至截稿前未有回覆，令這段三角關係更耐人尋味。