彭浩翔新作揮低偉仔

由杜汶澤孭飛、彭浩翔執導的《低俗喜劇》，上畫3日勁收491萬，同期上映的《聽風者》內地上映一周收1億3千萬，香港上映4日只收180萬。對此阿澤不敢認叻：「兩套戲唔同風格，冇得比較，我一生人嘅成就又點可以超越偉仔呀？況且喜劇個勢都唔同啦！（做多啲本地題材？）會呀！有人願意投資開一系列純本地題材，我預計3千萬拍5部。」

彭浩翔昨日受訪時說：「冇話邊個贏邊個，贏輸唔重要，最緊要市道好。（幾時開續集？）應該原班人馬再合作，可能開《官人放題》，最快出年開工。（陳靜定邵音音做女主角？）佢哋唔係二合為一嘅咩？（唔再開電影業秘聞題材？）唔啦！所有好笑嘢都放晒入《低俗喜劇》度。」此外，彭導前晚到銅鑼灣馬拉松式謝票，他與片中「神物」騾仔赫然出現，大受影迷歡迎，他說：「我同杜汶澤分開謝票，都數唔到謝咗幾多場，但愈謝愈興奮。（阿澤話希望《低》打低你前作，成為本年度港產片票房冠軍？）咁真係要贏人先要贏咗自己先。（偏心邊齣？）最緊要觀眾睇得開心，但《低》係三級片，有好多觀眾唔夠18歲入唔到場噃！」