吳雨霏關楚耀娛圈選手

每個人少不免要經歷人生交叉點，「選擇」是一門高深學問，「一子錯，滿盤皆落索」，選得對，事半功倍；揀錯路，有可能永不翻生。關楚耀與吳雨霏這兩位80後歌手，前者三年前幾乎「一鋪清袋」，他痛定思痛，努力望谷底翻身；後者去年作出重大決定，轉投新公司，愈唱愈順；原來，他們也選對了！

吳雨霏 求變．爭主導權

由Cookies「九餅」變「四餅」，其後組樂隊Ping Pung夾Band，再選擇單飛發展，至去年離開合作九年的「金牌」，轉投新公司環球，吳雨霏（Kary）十年間經歷多次變化，可算是「百變」歌手。

Kary表示入行首五年沒有太多選擇權，全交公司安排，近年她自覺「大個女」，去年毅然立定主意轉唱片公司，她說：「以前做新人乜都唔識，唔知要乜方向，只係不停吸收經驗。大個咗，知道乜嘢適合自己，去年轉公司係人生重大選擇，期間有幾個月好迷失，呢大半年係人生中最長嘅大半年，好似過咗十年咁，好彩自問EQ算高，情緒都控制得好，始終轉公司係好大嘅決定，因為一簽就幾年，唔可以有任何差池。」

自認幾挑剔

16歲已入行的Kary，熱愛娛樂圈工作，她說：「我好想做呢行，一想去做就冇人可以Stop我，我亦有問家人意見，當時係一邊返學一邊做嘢，但隔咗冇耐，擔心兼顧唔到，兩頭唔到岸，所以最後決定選擇做嘢。」她笑言自己亦有「選擇障礙症」：「小事上會有，即係好似食乜嘢、着乜衫，但大事上關乎自己事業愛情嘅，就要果斷決定，有時我都幾挑剔。」

去年仍於舊東家的Kary，原本有機會亮相無綫，但自轉投現在的公司後，於電視上的曝光率明顯減少，但她表示已經習慣：「簽得呢間公司，就要尊重公司政策，呢個就唔到我選擇。」Kary甚少選擇錯誤，加上身邊有不少好友充當軍師給予意見，她說：「身邊嘅人好緊張我，好似好朋友馬天佑，佢好熟我脾性，工作上畀到好多寶貴意見同決定。」加盟環球後Kary常被指「坐正」一姐寶座，是非纏身，她說：「其實公司仲有好多女歌手，我對比較呢方面又冇乜嘢，但會多謝公司咁錫我。」

行動最實際

事業上Kary揀啱路，情路上她亦達到「愛是最大權利」目的，最近被指與舊愛「網球王子」洪立熙翻撻，她亦已承認復合，將對方「升呢」為屋企人，關係更親密。對於感情狀況，Kary輕描淡寫地表示順其自然發展，暫沒結婚打算。

對於愛情，她認為始終是感覺行先：「鍾意啲人Action多過得把口，因為會見到誠意。」未知洪立熙是否再Take Action，所以成功再闖心「霏」？但原來Kary亦曾「被出賣」，其新作《告白》歌詞部分便是其自身經歷，她說：「首歌講出賣，有啲係自己經歷，亦有朋友嘅故事。」

後記：跳舞小妹

吳雨霏入行初期較多跳舞作品，其後愈唱愈多慢歌，更不乏慘爆怨曲，她最近則重施舞技，為新快歌《狠狠》排舞，她說：「之前太多慘情歌，想有個轉變，而且長線嚟講，快歌可以同樂迷互動，但我依家仍係『跳舞小妹妹』。」

關楚耀 知衰．重返正路

挾着「譚詠麟契仔」之名闖樂壇的關楚耀（Kelvin），三年多前誤入「毒」路，鑄成大錯，知恥近乎勇的他事後知衰，決心洗底，近兩年除了唱歌，還拍戲、拍劇及登台，重新做人的他人氣與收入更勝從前。當年Kelvin花了一整年時間自我反省，加上身邊貴人扶助，令他得以有機會「翻身」，他特別感激伯樂兼唱片公司高層黃劍濤（Duncan）。

唔敢再漏氣

「同佢亦師亦友，佢對我事事緊張，好似之前我決定剪短頭髮，一個高層其實好少理會個藝人染髮定剪髮，但佢會畀意見，見微知著，係好大推動力，見到身邊有人咁緊張自己，我真係唔可以再漏氣，要做得更好，有時Duncan會畀Message我，問我拍戲進度點，令我感受到佢對我好好，佢係我人生裏面另一個父親。」問Duncan是否特別偏心他？Kelvin說：「相信佢對其他公司藝人一樣，只係每個處理手法唔同，我唔想再令佢失望。」

對於「四大」與無綫的關係仍未好轉，令身為環球歌手的Kelvin未能於公仔箱增加入屋曝光率，他表示會聽從公司意見，而且他有亮相其他電視頻道。

目前Kelvin已有穩定女友，但仍避無可避經常被問到與舊愛衞詩的事情，Kelvin並不介意，他說：「唔會特別避答，家人同女友都知件事，冇乜好避，不過就真係少咗聯絡（衞詩），若然見到面唔會尷尬，就算歌曲合作都OK，只係再講呢個話題有啲悶，始終事情過咗去。」

甚少飛來蜢

自從選擇公開戀情後，Kelvin心情輕鬆不少：「成件事舒服晒，始終女友唔係圈內人，佢都想低調，但慢慢都明白同接受，我哋互相尊重，會理對方感受。」他笑言拍戲時若與對手有親熱戲，都會自動備案：「點都同佢講聲，佢完全支持，有時仲叫我一定要拍，因為對我嚟講係好機會。（探你班？）咁又冇喎，其實我都好怕女友、朋友或家人嚟探班，好驚分心，又驚佢哋等得耐會悶。」

娛樂圈「飛來蜢」多的是，幸Kelvin自信定力夠，他說：「好少喎！冇乜女仔特別向我示愛，做嘢最多係傾吓偈，冇特別Signal覺得有人對自己有意思。」Kelvin追求舒服簡單的愛情，並補充說：「最緊要信任，唔好有任何質疑，就算有都淡化佢，唔好搞到咁肉酸，同埋我唔會完全霸佔對方，要各有私人時間。」

後記：默默支持

跌過錯過，關楚耀亦無悔加入娛樂圈，只因這是他自己的選擇，家人亦默默支持，令他更感鼓舞。三年前他的確做錯，事後他選擇慢慢爬起身，將要面對的壓力變成推動力，至今工作不斷，父母亦告安慰。