譚凱琪交換信紙10級必勝法

有線主持譚凱琪小時候受姊姊啟發，愛上儲信紙，雖然只是月花百多元的玩意，但她卻相當認真，更自創「交換信紙必勝法」，務求以最低成本收集最多心頭好，甚有生意頭腦！

譚凱琪（Zoie）小時候已是收藏家一名，只要見到漂亮的信紙、貼紙或書籤，便會二話不說買回家，她笑言養成這個習慣，全因受姊姊影響：「我兩個家姐乜都儲一餐，信紙、貼紙、筆、郵票、錢、書籤同明星相，我見佢哋儲得咁開心，咪又揀咗幾樣嚟儲囉！主要係貼紙同信紙！」為此，她小時候經常流連文具店，因而與老闆及職員混得很熟：「我一有零用錢同利是錢，就會行文具舖買信紙同書籤，老闆仲以為我好勤力讀書添！（一個月使幾多錢儲？）大約百幾二百蚊。」

精品換「核突嘢」

由於資金有限，Zoie受姊姊啟發發起「交換行動」，定期與志同道合者交換心頭好：「家姐細細個已經好有生意頭腦，佢話橫掂同一款信紙要咁多份都冇用，同人交換仲好，所以嗰時好搞笑o架！開學第一件事唔係問同學拎電話，而係問有冇儲信紙，一知道邊個儲，就第一時間通知家姐，然後約埋去嗰個人屋企，或者叫嗰個人帶信紙返學校，喺小息時交換。」

Zoie笑指現時開時裝店的家姐頭腦精明，不時耍小手段騙取其信紙：「如果我有套好靚嘅信紙佢想要，佢會先講到我套信紙好唔靚，然後拎啲唔靚嘅同我交換，又話佢嗰啲先叫靚，等我誤以為自己有賺！所以有時睇番啲收藏品，我都會問點解會有啲咁核突嘅收藏，嗰啲通常都係畀家姐呃o架喇！」

鍾情特別設計

未知是否被呃得多，Zoie後期自創了一套獨特的「交換信紙必勝法」，令交換信紙行動變得像做生意般諸多計算：「我會將啲信紙分成十級，最鍾意嘅係一級，同人交換嗰陣，我會先將冇咁鍾意嘅拎出嚟，見人哋冇反應，先搵啲靚啲嘅同人換，最靚嗰啲我點都唔會拎出嚟！如果出動到靚啲嘅都打動唔到人，我會嘗試用幾套去換一套好鍾意嘅。當然換嗰陣，我唔會表露我對人哋啲信紙有幾鍾意，要扮到好唔在乎咁。」

在眾多收藏品中，Zoie最愛的並非名牌卡通人物，反而是剪裁獨特及少女味濃的款式：「我鍾意Cutting好靚嘅信紙，例如人形或動物剪裁，咁樣好似特別啲。我記得有套信紙係狗仔加狗屋，而且隻狗仲可以郁，我好鍾意，另外少女公仔頭嘅款我都好鍾意。」

攝卡紙防皺摺

信紙容易變色又易皺，要好好保存實在不容易，「專家」Zoie在此分享心得：「我會用簿攝住每張信紙，等佢唔好咁易皺同起角。另外我會將信紙分成一至十級，代表鍾意嘅程度，再根據級別放入唔同嘅袋，然後喺後面攝張硬卡紙，等佢哋唔會咁易屈皺。」