DREAM DYNASTY四片「雌」心闖樂壇

新進四人女子組合DREAM DYNASTY於書展推出寫真打響頭炮，下一步會推出K-pop形式跳舞快歌正式闖樂壇，她們近日每天練舞8小時，期望以最佳舞姿出擊！

日本及韓國一直都流行大堆頭的跳舞組合，香港多隊女子組合曾先後模仿，惜仍未有「代表作」，由賴鎵瑜（Scarlett）、趙美琪（Mena.C）、譚惠珊（Roxan）及林東怡（Liva）組成的四人女子組合DREAM DYNASTY就望突圍而出！

早前她們於書展推出寫真集《DREAM ARISE》，讓粉絲先認識她們，一眾成員的身材都「有番咁上下」，寫真中不乏騷身材的泳衣照，但她們強調並非模！Mena.C說：「我哋本寫真封面揀張咁密實嘅相，就知道我哋賣點唔係露肉啦！」

書展結束後，她們要預備派歌，新歌結集K-pop舞蹈元素，堪稱「港版KARA」！她們日日喪練舞八小時，練到叫苦連天，但為了增進舞技只好頂硬上！隊長Scarlett說：「我哋之前唔係跳開舞，所以要花好多時間拉筋，次次都會嗌到拆天！」

街頭舞騷試反應

早前她們曾在旺角行人專用區搞街頭跳舞騷，引來大批市民圍觀，Roxan說：「第一次公開表演嚟講算係唔錯，起碼冇甩拍子，不過始終係新人，唔夠自信，希望再練多啲會再進步！」