張暖雅被舊愛騙財 冇膽溝仔

「D Cup馨予」張暖雅（Angelina）憑34D暴乳在電影中大行性感，但她對「三級女星」之名極為抗拒，並呼冤：「我冇露點，點算係三級女星呀？」聲稱單身的她自爆被前男友先騙財後敲詐，令她不敢再闖情關！

來自內地的Angelina天生一副好身材，加上有幾分似吳卓羲女友張馨予，近年片約不斷，對於在電影中以性感形象出位，她說：「我都係想搵條路行啫！不過被封『三級女星』，好唔開心、好大壓力囉！我冇露過點，點算係『三級女星』呀？我最怕父母誤會我拍三級片。」

擔心素顏照被公開

Angelina樣靚身材正，但她大呻：「我冇人追，亦都唔敢識男仔，因為我畀人呃過。」其舊男朋友生意失敗，當年仍讀大學的她不惜為愛全奉獻，將做模特兒所賺得的錢全借給對方，還變賣樓房、車及首飾，甚至代男友向父母借錢，惜前男友「鹹魚翻生」後卻移情別戀！

最令Angelina氣憤的是，舊愛得知她來港做明星便開始向她敲詐：「佢（前男友）話手頭上有我啲相，如果我唔畀20萬佢，就會公開啲相。（情慾照？）梗係冇啦！只係啲我冇化妝同生活照，佢話要抹黑我整容。」她曾向律師求助，可是律師稱目前情況無法作任何行動，惟有被迫放棄：「我唔敢再識人，最慘係連我啲女朋友都會呃我啲男人。」