岑潔儀氹老公一味靠「吹」

出道時以性感見稱的女星岑潔儀（Zoey），自年初成為陳太後，正式展開人生另一章。雖然已為人妻，但Zoey不但沒有走樣，反而愈來愈索，成為「索爆靚太」，加上御夫有術，言行檢點， 又識吹水氹老公，難怪老公Dixon錫老婆錫到燶！

潮流興遲婚，不過亦有人唱反調寧願早婚，現年25歲的女藝人岑潔儀（Zoey），於年初在印尼峇里島拉埋天窗，正式升呢做陳太，談到是否早婚？Zoey說：「以前年代24、25歲結婚已經好遲，依家好多女人等到30歲左右先結婚，我認為女仔唔好太遲婚，始終遲婚跟住生BB的話，容易出現代溝，反而早婚早生BB，距離唔會差太遠。」入行超過7年的Zoey，婚後已修心養性，她說：「我15歲已經出嚟玩，以前拍拖點玩都玩過，得到足夠經驗，玩咗咁多年，終於遇到個真心愛我、錫我又有責任心嘅男人，所以我嫁畀佢，講真結婚之後個人定性咗，依家我同啲男性朋友，見面時都唔會好似以前咁，熱情地攬一攬，始終檢點啲好，比其他人睇到唔係幾好嘛。」

唔怕飛來蜢

圈中出名誘惑多，惹緋聞更易過借火，已為人妻的她，如何出招謝絕「狂蜂浪蝶」？Zoey說：「我會主動中又帶點不經意同對方講：『我老公乜乜乜、我老公物物物』，畀個Signal佢知我已婚，等佢知難而退。」Zoey又謂老公婚後亦試過畀女撩：「有次我同我老公，以及我啲朋友出去飲嘢，有個女仔朋友明知佢係我老公，都搭住佢膊頭，撩佢傾偈飲酒，當時我同其他朋友吹水，我老公走過嚟同我講，我當時笑笑口話：『算啦！都唔係對手﹗』我信得過我老公。」

Zoey曾與台灣歌手陶喆傳緋聞，又被指與李思捷在夜店爆不快事件，她直言現時對圈中男星不聞不問：「唔關係咪結咗婚事嘅，只係我對圈中男人一啲興趣都冇，佢哋諗嘢有問題，太自以為是。（留意陶喆及李思捷新聞？）冇留意，亦唔會理。」

煮婦愛學習

問到如何御夫？她說：「最緊要氹佢啦，我哋年紀相差唔遠，又有共同話題，雖然佢係圈外人，但我老公好吹得，經常傾啲圈中嘢，我哋又融入大家社交圈子。（着性感睡衣？）梗係會，呢啲係生活情趣。」問到是否一個模範「煮」婦？她謙稱：「基本餸菜都識煮，照顧家庭仍然上手，仲有好多嘢學緊，（做家務？）洗碗居多，我老公會同我分擔。」婚後Zoey仍活躍娛樂圈，問到會否接拍激情戲？她說：「都會拍，當然要睇劇本，但同老公備案先，呢個係我工作，專業演員唔應該有太多掣肘，（性感打扮？）都得嘅，睇場合啦，呂慧儀出席活動時都好性感。」

婚後Zoey兩公婆雖然生活美滿，但偶然亦會嗌交耍花槍，她笑稱：「嗌交梗有，係我哋相處方式，總好過鬱住吖，我哋床頭打交床尾和，老公會氹番我，送花囉。」Zoey羨慕「咪神」徐淑敏（Suki）擁有幸福家庭：「佢簡直係我偶像啦，我同佢老公（Kenny）都係好朋友，我睇住佢哋撻着，佢哋好襯，Suki叫我快啲生BB。（教御夫術？）咁又冇，我好體諒老公工作壓力，返到屋企唔會畀壓力佢，呢個好緊要，唔好太過綁實佢。（同女性朋友？）我認識都OK嘅，或者同生意上有關冇問題。」問她是否「大女人」？她想了一會：「少少啦，但適當時候我會小鳥依人。」

後記：做好呢份工

愛美是女人的天性，無論婚前或婚後都要Keep住最佳狀態，岑潔儀表示結婚前為了穿婚紗，做個漂亮新娘子，節食做運動Keep Fit減肥確實無可厚非，本以為婚後可以放縱一下，原來又要不斷增值，無論外在及內在更要勝過「做女嗰陣」，不過Zoey樂於做好老婆呢份工，故她經常學跳舞及演戲，努力進修。