Bosco含淚蒲頭求杏兒復合

胡杏兒日前宣布與黃宗澤（Bosco）斬斷八年情，導火線疑是男方偷嗒「國產巨乳」柳岩。昨日本報收到可靠消息，分手主因是杏兒多年來承受男友不少花邊緋聞，在長期鬱結下壓力爆煲，於個多月前才正式分開！潛水兩日的Bosco昨日愁爆現身機場，眼濕濕坦言想復合！

無綫三位小生黃宗澤、吳卓羲與林峯連日爆出糊塗情債，相關人士齊成輸家！當中最令外界跌眼鏡的是Bosco與杏兒這一對，自日前杏兒承認分手後，外界即揣測Bosco又「作反」，而小三矛頭直指國產佳麗柳岩。不過隨着柳岩發聲明澄清非小三（見另文），本報亦收到黃胡分手內情！

據知，Bosco與杏兒彼此仍有感情，對分手也感到難過，但因桃花爆旺的Bosco多年來緋聞不斷，加上二人近年各自中港兩邊走拍劇，長時間分開，無法好好相處及溝通，導致杏兒情緒受困，對男友緋聞倍感難受及失去安全感，長期處於不開心狀態。故她在個多月前提出要分開冷靜，雙方也沒有給冷靜期一個限期，望他朝若有緣分，不排除會復合。

愁爆赴台灣開工

事實上，無綫高層樂易玲日前力證Bosco沒有小三，又指與黃胡分別深入傾談，明白二人的選擇，又指Bosco為此事十分難過及落淚。自爆出「分訊」後，Bosco昨日首次公開露面，與經理人現身機場出發到台灣拍攝劇集《麵包樹上的女人》，飽受失戀之痛的他愁容滿面，頭耷耷兼黑眼圈，鼻頭及右邊面爆瘡，受訪時更一度強忍淚水！

記：記者　黃：黃宗澤

記：心情好啲未?

黃：都係咁！

記：知唔知柳岩出嚟解釋咗自己唔係小三？

黃：呢兩日真係冇乜留意新聞，同埋都唔好意思，分手係兩個人嘅事，好似牽涉咗好多人，搞到佢哋好似好無辜，真係唔好意思。

記：杏兒受訪時喊晒，好似心情未平復，會唔會追番佢？

黃：呢啲遲啲先講！

記：佢講到好似有小三介入？

黃：（堅定地搖頭否認）唔係！我同杏兒一齊傾過點同大家交代，之前我喺電台講完，唔再講。

記：樂小姐話想你哋復合？又話同你傾時你喊，係唔開心定有鬱結？

黃：希望啦！分手喊都好平常嘅！

記：對杏兒仲有感覺？

黃：（嘆一口長氣，靜默良久才發言）呢啲唔想再講，唔好意思。

記：台慶時杏兒話你難頂？會唔會改？

黃：我性格都幾難頂，但每日都要進步。

記：同柳岩咩關係？有冇約飲嘢同食飯？

黃：同佢唔熟，除咗拍攝兩三日外，冇見過！

記：傳你有好多女？怕唔怕影響形象？

黃：呢個之前交代咗，同杏兒有共識唔會再講，唔好意思，畀少少空間我哋。其實呢件事發生之後有好多揣測，有心理準備，事情應該告一段落。

記：你曾經話杏兒係結婚對象，分手好可惜？

黃：（忍不住眼泛淚光，抿嘴強忍，語帶哽咽）唔想再講。

與杏兒仍有聯絡

記：媽咪有冇問？

黃：冇乜，不過尋日媽咪坐我車出街，有記者跟住，佢差啲跣親，希望大家畀啲空間佢。

記：依家有冇同杏兒聯絡？

黃：用短訊溝通點處理件事。

記：你同林峯、吳卓羲都被指同玩「乳牛」？

黃：其他人嘅事唔想評論。總之唔係咁！

記：同杏兒邊個提出分手？

黃：同杏兒有共識唔想講，希望大家明白。

記：同柳岩仲有冇對手戲？

黃：冇，佢拍嘅完成咗，唔會再同場，今次我留台灣一個月。

記：會唔會少啲北上減是非？

黃：往後再講。

記：去到台灣同杏兒聯絡？

黃：畀番我哋私人去諗啦！