祖藍探貧童憶兒時憾事
王祖藍、唐寧與歐倩怡等早前應「培幼會」邀請到陝西探訪，由於分開行程，當唐寧得悉祖藍遇上交通意外時，嚇得憂心忡忡，幸對方無大礙。旅途中發現當地小朋友的生活條件甚差，令已為人母的唐寧及歐倩怡不禁落淚。
祖藍最大得着是與助養的小孩見面，對方還繪贈一張畫像。談起「兒子」，他激讚兩兄弟知書識禮：「我畀糖佢哋食，佢哋話寧願要書！鄉間嘅小朋友冇受到資訊發達所影響，創意可以無限，佢哋仲教我用泥土整公仔，某程度上叻過我。」他又透露在他們身上想起童年憾事：「以前暑假都返圍村同爺爺嫲嫲住，點知有年我想提早返屋企打機，點知走咗後爺爺就突然離開咗。我成日都諗如果肯留多幾日，起碼可以同佢出席一個活動，佢其實好想帶我一齊出席o架！」
歐倩怡（左起）、王祖藍與唐寧對陝西探訪各有感受。