梁烈唯演變 弱雞扮猛男

梁烈唯早前演繹懦弱的「關二哥」一角深入民心，在新劇中則飾演飛虎隊中的神槍手，他笑言曾向監製自薦做賊，而演這個角色最困難之處，竟然是要說服自己「有型」。

無綫藝人梁烈唯（唯唯）在劇集《飛虎》中，飾演飛虎隊中的神槍手，以往唯唯常飾演小混混、懦弱被欺負的角色，新劇出街後，他常被途人指他靚仔、有型，唯唯說：「估唔到『關二哥』呢個廢柴都會做到神槍手！本來個角色係李璨琛做嘅，不過佢冇期，所以梁家樹（戲劇科高層）搵我，我仲上監製度自薦做賊，佢哋搵馬德鐘、袁偉豪、王浩信、羅仲謙個個都係猛男喎，冇諗過我都有份！不過呢個角色好討好、有血有肉，牽涉好多條線，有好大發揮。」問到拍攝時會否有困難？他說：「難唔係難，但我未做過咁型嘅角色，最初唔係咁有信心，拍嗰時要不斷催眠自己，家姐嗰排都問我點解咁少嘢講。」

拍拖十年恨婚

唯唯現時一劇接一劇，會否被女友詐型？他說：「佢都好忙，我哋今年拍拖十周年，佢生日我陪唔到佢食飯，收工時趕去同佢慶祝，佢好感動！之後我又要拍《仁心解碼II》，佢都好明白，要珍惜機會。（明年結婚？）財政OK嘅話可以即刻結添！不過想儲多啲錢先，女友的確好好，阿媽都好放心有呢個『未來新抱』照顧我！」