HotCha分頭出書搵銀

女子組合HotCha成員Crystal及Winkie，以才女姿態轉戰文壇，其中Crystal去年推出的奇幻愛情小說大賣，故今年繼續揸筆搵食，怎料因要求極高致心理壓力太大，一度「冧廠」，她說：「早排要寫書同做舞台劇，又要兼顧出碟，搞到體力透支，除暴瘦外仲胃抽筋，痛到食唔到嘢，只可以飲提神飲品『吊命』！」她笑言小說中有「床照」：「唔係引人遐想嗰啲，同模嗰啲唔同。」

至於Winkie則熱愛時裝及旅遊，故專程赴日拍照及做資料搜集，花了一年時間籌備集旅遊及時裝於一身的新作，她說：「最驚喜係可以參觀一間牛仔褲廠，親眼睇佢哋縫製牛仔褲，間廠從未開放過，好珍貴！」

Crystal（左）與Winkie兼顧唱歌與寫書，忙到爆但非常滿足。