李彩華千六萬掃豪宅

李彩華早前與圈外男友分手，專心工作密密搵銀的她，近日更一擲千六萬元購入渣甸山豪宅，前日她與母親到新居視察裝修後再往揀貴價傢俬，其後還闊綽地購下約二百萬元的鑽石獎勵自己。

李彩華（Rain）近年轉戰內地發展，劇接劇的她身價不菲，片酬已升至25萬元人民幣一集，難怪近年密密買樓，最近她又再出擊，豪擲一千六百萬元購下渣甸山的豪宅「名門」一個高層單位，與關心妍做鄰居。

Rain雖然近月與台灣藝人朱孝天在內地拍攝新劇，但前日難得回港，即與母親及友人往新居打點裝修。當日中午十二時許，Rain等人到達新居後，見她表現興奮，與友人於露台研究景色時更講到眉飛色舞，其後她又到房間與師傅商量窗台的裝修事宜，逗留個多小時才離開，並前往灣仔一間貴價的裝修公司。

親身試浴缸

Rain似乎對洗手間的裝置甚為着緊，見她全程專攻浴缸及坐廁，她更坐在浴缸親身體驗，左揀右揀後才往櫃枱落訂。豪使一輪的Rain意猶未盡，與圈外男友潘啟翀（Derek）剛分手的她，未知是否要使錢治情傷，其後與母親前往中環的珠寶店，母女甫坐下已頻頻揀選鑽石，Rain細心挑選後即闊綽地扑錘購下二百萬元的4卡巨鑽。

兩人離開時記者上前追問她以千六萬買樓一事，她說：「係呀！買樓夠保值嘛！（內地拍劇搵好多？）都OK，嚟緊又接咗新劇同電影，下半年都好忙。」提到豪買巨鑽時，她大笑說：「你睇到係咪係囉！其實我賺嘅錢都畀晒媽咪，佢覺得買樓同鑽石都好保值，所以佢都贊成嘅！」至於感情事，Rain坦言不心急：「等個天安排啦！經過咁多次，都希望搵到個啱自己嘅！」