Lynn決不殺生 城城願負責任

郭富城女友熊黛林早前被指懷「城B」逼婚，卻反被逼墮胎。二人怒斥「妖言惑眾」，並斷言不會殘害生命，城城強調有BB是福氣，若女友懷孕他會負責任。

早前網上有報道指熊黛林（Lynn）懷孕，趁機向男友郭富城逼婚，卻反被逼墮胎，Lynn在微博直斥報道妖言惑眾。前晚城城出席活動，對傳聞大表無奈：「對網上流傳我一直保持沉默，之前Lynn喺網上澄清咗，佢用四個字『妖言惑眾』已經交代晒，根本冇咁嘅事！（如果Lynn有咗會唔會負責任？）如果有BB係上天賜嘅福氣，點解要做啲咁嘅嘢（墮胎）？」

另一邊廂，Lynn昨日偕林峯等出席電影《男人如衣服》煞科宴時，直斥指她墮胎的報道「低能」：「殺生唔做得！（有咗都唔落？）係！呢啲好難得，唔做缺德嘅事，一條生命唔可以話唔要就唔要。（叫城城呵番？）唔好喇，佢咁忙，年年都講幾次呢啲嘢，自己都唔會理。」

林峯送金豬券

活動上，Lynn獲林峯送上3張金豬券，林峯說：「希望你現實中可以用咗佢！」Lynn口快快回應「承你貴言」！問到今年是否用得着金豬券？Lynn撒嬌說：「冇可能。（又話承你貴言？）我都唔知金豬券係乜！（明年呢？）一年講咁多次，萬一冇得嫁點算？」