Jeana只識彩虹寸Rainbow冇人識

內地性感女星「D Cup張馨予」張暖雅，昨與Jeana（何佩瑜）等出席書展活動，豪露四吋事業線加缽仔糕出擊，盡搶密實的Jeana「峰」頭，但疑因過分性感，遭會場三名保安挾走，要披回圍巾才敢折返書展。她在活動中寸爆寫真被禁的許穎：「聽聞佢最後一年出寫真，冇埋呢個機會真係冇乜機會！」Jeana亦「踩多一腳」指許穎寫真冇Feel：「我平時都鍾意照鏡，望自己就OK！（戥佢唔抵？）No Feeling！」談到o靚模胡心諾（Rainbow）涉及錢債糾紛，她說：「彩虹？小學生都識啦！（人嚟o架！）我唔識喎！是非嘢我冇睇，我Out喇！」

另一邊廂，有指Rainbow所屬的o靚模組合冬甩早前為餐廳宣傳，負責人曾口頭承諾買500本冬甩寫真集，但最後稱是租出餐廳，還要冬甩賠償10萬元。Rainbow坦言已報警備案：「警方建議我哋向小額錢債審裁處求助。」問到會否擔心被追討租場費？她說：「唔怕，律師話租場費係活動前畀，同埋要有收據。」