蘇莉箝實唔放氹番靚佬湯

湯告魯斯（Tom Cruise）自從上月與老婆姬蒂賀姆絲（Katie Holmes）離婚後，一直沒見過女兒蘇莉（Suri），前日父女終於「團聚」！靚佬湯被拍得抱着愛女四圍去。

上月與姬蒂入紙申請離婚的靚佬湯，前日早上在加州拍完戲，漏夜乘私人飛機到紐約見囡囡。據知他親自到姬蒂新寓所接女兒，但姬蒂卻沒有影蹤，靚佬湯逗留不到5分鐘就離開，抱着蘇莉從後門返回下榻的酒店，而蘇莉全程拿着毛公仔及攬實老竇，靚佬湯妹妹Cass則拿蘇莉的戰利品上房，至於住在同一酒店的荷里活女星姬赫遜（Kate Hudson）現身時亦被圍困。靚佬湯與女兒於下午換Look外出取車，準備上體操堂，而蘇莉則繼續箍實老竇。上完堂後，靚佬湯對記者笑說：「好好，多謝。」

據知靚佬湯父女未來數天亦會一起過，消息人士指與囡囡分開1個月的他很想見女兒，故今次難得見面，無論蘇莉想到哪裏，他都會奉陪到底。此外，盛傳蘇莉入讀的天主教聖心學校要求學生逢周四望彌撒，還要學拉丁文。而姬蒂則被指與靚佬湯離婚後，希望女兒穿着與年紀相襯的衣服。

肥尊拖老婆度假

另一邊廂，靚佬湯的科學教教友「肥尊」尊特拉華達（John Travolta）與老婆姬莉佩絲頓（Kelly Preston）日前在希臘愛琴海麥卡諾斯島度假，二人被拍得手拖手行街。雖然肥尊早前涉嫌性騷擾男子而被指同性戀一事近期無進展，但據知肥尊夫婦的所在地被視為地中海的「基」地。