周麗淇拒唱舊愛
名模周汶錡（Kathy）與歌手妹妹周麗淇（Niki）前晚一同出席活動，問到會否考慮簽約同一經理人，Kathy笑說：「我成日話Niki拍戲，我可以做佢替身，遠鏡或背脊都得！」Niki即笑說：「佢可能仲貴過我！」她坦言曾考慮請姊姊擔任MV女主角：「我諗過搵個型男配家姐，佢未試過拍MV，處女MV應該畀我！（唔成事？）搵唔到型男襯佢，或者搵番Julien（Kathy男友），佢好有喜劇細胞。」她還嘗試為新歌填詞，但不會以自己的愛情故事為題材。
同場的Jessica C.將返美探親，她有感而發說：「全家得我一個仲係單身，以前定咗25歲生小朋友，依家推遲到30歲。」而莊思敏則表示不會送新書給緋聞男友王大業：「梗係要佢買，作為朋友應該支持！」
周汶錡（右）自薦做妹妹周麗淇的替身，對外形相當有自信！
Jessica C.上堂學拉筋，希望改善體態。