祖兒含苞待放 推油動情

容祖兒在英皇電影《DIVA華麗之後》中,雖並非與男友劉浩龍飾演一對,但難免成為焦點。戲中與失明按摩師胡歌譜戀曲的她,坦言演繹時套用了真實中「含苞待放」的愛情觀。

樂壇天后容祖兒在英皇電影《DIVA華麗之後》中,與胡歌演繹一段當紅歌姬與失明按摩師的愛情故事,二人以真愛突破身份差異,賺人熱淚!祖兒說:「戲中我又錫又除,好畀心機!本來預咗個替身畀我,但我都親自拍番推油嗰幕,因為胡歌推得幾舒服!」

問到有否票房壓力,祖兒笑說:「我冇票房概念,但我冇得輸,因為冇贏過!」她感激杜汶澤不時從旁提點:「佢話我投入真感覺做就好睇,我咪套用咗真實中含苞待放嘅愛情觀囉!(介意焦點落喺你同劉浩龍度?)冇去諗,我相信公司了解我嘅做事方針,使乜出到花邊新聞。(拍戲賺埋段感情?)係賺咗同成個劇組嘅感情。」

黑絲襪晒美腿

而杜汶澤則被追問劉浩龍沒有戲份時,有否借故親近祖兒,他笑說:「點答呀!(預告片冇劉浩龍,唔想觀眾焦點錯放?)剪嗰陣都未發生(龍兒戀),如果擺劉浩龍同祖兒專訪,媒體焦點實唔同,但我哋會照番原來嘅宣傳安排,唔會刻意改變。(佢哋拍廣州外景時有冇失蹤?)冇留意呀!」

雖然忙於宣傳新片,但祖兒對歌唱事業亦沒有鬆懈,她邀得國際級攝影師陳漫為國語專輯《Moment》拍封套,身穿Bra Top、熱褲及誘人黑絲襪騷長腿,女人味滿瀉!

影視組

沐浴愛河的祖兒,舉手投足分外迷人。

身材勻稱的祖兒,輕易扭出S形體態,女人味滿瀉!

祖兒與阿澤拍畢新片更見默契,你一言我一語,傾到哈哈大笑。

祖兒在片中飾演當紅歌姬,與失明按摩師胡歌譜戀曲。

祖兒與公司有共識,不希望與男友劉浩龍(左二)的戀情成為宣傳重點。