高海寧贏Suki九條街

新舊「咪」神高海寧（高Ling）與徐淑敏（Suki）昨日「決戰」灣仔書展，高Ling人氣明顯比已婚的過氣咪神Suki優勝，幸好Suki以一襲透視露背裝挽回少許面子，不致輸到一蚊都冇剩！

高Ling與Suki昨日在灣仔書展為各自推出的新書造勢，兩人為免教壞細路，沒有騷胸增聲勢，只各出奇謀爭人氣。高Ling穿上泰山裝及戴上母親送的水晶戒，到攤位Sell書帶動熱鬧氣氛，成功獲現場幾十名Fans加市民撐場，而Suki則選在簽名區簽名，可惜只得十多位粉絲排隊，人氣可謂輸晒！雖然如此，但Suki以一襲露背裝，總算贏回部分「收視」，不致輸得太厲害！

講男友面紅驚青

對於新書《寧.....密語》面世，高Ling坦言十足生仔，前晚看到新書時有想哭的衝動，她還親自校對錯字及做足準備工夫，問到為何不穿得性感一點？她說：「開心、靚咪得囉！」問到新書會否談及感情事？她顯得十分慌張，嚇到面都紅晒：「冇！入行都冇！（旅行社太子爺男友？）冇！（散咗？）總之冇，依家單身！」驚青的她還把自己的新劇說成在前日煞科兼開鏡。

高Ling為新書造勢完畢後，前咪神徐淑敏到書展簽名區為新作《甜美素肌》舉行簽名會，只得十多個粉絲，人氣普通！對於老公覺得她懷孕，她說：「應該唔係。（點解老公覺得？）可能我易忟，食嘢想嘔，我諗係出書壓力大先會有疑似有咗嘅迹象，唔生住，下年先！（想唔想生仔？）有梗係好。」