天華Chok到45歲醉快冧

謝天華前晚舉行派對慶祝45歲牛一，不少圈中好友到賀，他囂張地表示不會飲醉，並準備了車接載醉酒朋友回家，結果卻第一個醉倒離場，更不斷豎拇指Chok樣影相！

前日45歲生日的謝天華，晚上在灣仔的日本餐廳舉行生日派對，好友林峯及堂妹林夏薇、錢國偉、方力申、排舞師Sunny、傅明憲與男友莊家彬、洪天明及老婆周家蔚及苗僑偉夫婦等亦有出席。向來Chok爆的天華入場前受訪時說：「套劇啱啱拍晒，可以喺正日慶祝！老婆送咗部水底攝影機畀我，希望下個月可以同老婆去旅行潛水。」問到是否不醉無歸？他即「沙麈」地說：「我已經Book定車同司機，預咗啲朋友要抬走，我就梗係唔會醉啦！」

「有餡」家蔚齋飲水

問到傳有喜的家蔚有否在場內飲酒？天華大爆：「我淨係見佢飲水同食嘢食咗兩個人分量，乜唔係小器唔講得咩？」其後洪天明得知天華自稱不會飲醉，即寸爆地說：「佢唔會醉？我哋結婚，邊個畀人抬出去呀？」

壽星仔天華滿場飛，頻頻與好友暢飲杯杯清，不足3小時已第一個醉倒，結果由Sunny及錢國偉左右護法扶離場。腳步浮浮的天華邊扶着欄杆邊上車，醉到睜不開眼的他上車後仍不忘Chok，更突然向鏡頭豎起拇指笑笑口，當其妻Tina拍拍他膊頭，他即頭耷耷兼嘴扁扁，之後就與太太乘車回家。天華離開約10分鐘後，無綫高層樂易玲趕到，得悉壽星仔未夠12時已醉倒離場，哭笑不得。