傅穎宅男摩天輪陪坐任轉

將分別出新書的「變臉女神」傅穎及黃婉曼，昨日出席活動時否認整容，傅穎預告會與幸運粉絲坐摩天輪，為新書造勢！黃婉曼則堅稱其「V煞臉」全靠瘦面療程，更搞爛Gag自爆只打過破傷風針！

同樣盛傳整容的傅穎（Theresa）及now主持黃婉曼昨日齊齊亮相公開活動，兩位不同界別的「變臉女神」同場，果真難以分出高下！將於書展推出散文集的Theresa，預告本月22日搞簽名會造勢，並以奇招力抗一眾露肉胸模。她表示會在簽名會抽出4名幸運書迷結伴到主題公園坐摩天輪外，更揀了十多套Tube Dress及露背裝為新書影性感插圖，冧暈宅男粉絲！至於昔日的「天氣女郎」黃婉曼則會推出美容書，不過為了避開胸模，只好押後在書展後推出。

明年出美容書

近年屢被指整容的Theresa，談及日前遭「宿敵」鄧麗欣（Stephy）笑言要看圖片說明才認出她時，她大呼難以置信：「我唔信佢會咁講囉！」她強調整容是受染髮及雙眼皮膠紙「誤導」：「我每轉一次造型都畀人寫！頭髮由黑變金、再由金變黑都係，冇得介意！我都黐咗好多年雙眼皮膠紙，觀眾知我有冇整容！」雖然「變臉」傳聞傳個不停，但她透露有意明年推出美容書，認真勇！

強調冇打過針

至於最近因突變「V煞臉」而屢傳整容的黃婉曼，則強調臉蛋歸功瘦面療程：「下巴咁尖，可以係瘦面療程或搵人推拿，我都會介紹畀大家，因為我自己都試過！」她坦言近日太多好友好奇其瘦臉過程，故她計劃開美容院：「因為一定要有好嘅手法推面先會瘦！或者塊面打光啲下巴又會尖啲！」但她強調沒打過針：「都有啲驚青，如果有副作用就唔好！其實最近好多美容院搵我，話Free（免費）畀我，又話Sponsor（贊助）我做代言人，不過等我有需要先啦！其實我淨係打過破傷風針咋！」