陳苑晴練結他愛犬嫌彈得渣
模特兒陳苑晴（Sarah）三年前領養黑色唐狗，取名Guinnix：「嗰時養開隻松鼠狗死咗，掙扎咗一陣買定領養，覺得領養先可以真正幫到啲小動物。」她笑言剛收養Guinnix時，牠有不少問題，例如隨處便溺及咬爛傢俬等，因此她為愛犬學習狗隻訓練及悉心教導，終於令Guinnix改掉陋習！她自滿地說：「我教到佢出街會靠邊行，唔會行得快過我或者慢過我，仲教咗佢伸手同人打招呼！所以佢好受歡迎o架！」
另外，結他新手Sarah笑言Guinnix是鞭策她練習的最大原動力：「佢嫌我彈得唔好聽，聽咗一陣好快就走開，但係我啲朋友彈嗰陣，佢就會乖乖哋坐喺度聽，仲會聽得好陶醉，真係激死我啦！」
Sarah投訴Guinnix沒耐性聽她彈結他。
Sarah把Guinnix訓練得聽教聽話，Hand Hand絕冇難度！