湯洛雯甩嘴照殺星後代玩晒

《香港小姐競選》再惹來非議！身為昔日小生湯鎮業姪女的湯洛雯前晚於才藝表演時甩嘴唔啱Beat，竟輕易KO其他佳麗奪得「旅遊大使獎」，繼張名雅後再由「星後代」佳麗奪獎。

港姐頂頭大熱湯洛雯與張名雅，分別有叔父湯鎮業及舅公張堅庭「名人後台」，其中湯洛雯曾說過父親湯鎮宗會無限量支持，難怪兩人先後奪獎，為爭后冠打下強心針！

十四位候選港姐與等候「復活」的陳華鑫及鍾麗，前晚在番禺競逐「旅遊大使」獎，其中湯洛雯被抽中與譚曉榆對決，譚曉榆做齊大龍鳳，穿上民族服飾跳韓國舞，但不及獻唱林憶蓮作品《至少還有你》的湯洛雯。雖然湯洛雯唱得兩嘴、歌喉不俗，可惜中途發瘟唱甩Beat出醜人前，但依然與張名雅、朱千雪、林泳淘及黃心穎順利進入五強。

佳麗私下非議

整個才藝表演中，最有睇頭首選跳中國舞的黃心穎，習舞十二年的她展示難度舞技，身體柔韌性極高，「拗晒腰」盡顯功架，輕易贏了對手王舒銳。等待「復活」的陳華鑫騎呢地表演為手機保護殼裝飾，難怪在PK賽敗於穿上性感舞衣跳肚皮舞的張名雅，但大可考慮到旺角手機商場應徵。

雖然五強表演驚喜欠奉，但當大會宣布表演棟篤唱的湯洛雯勇奪「旅遊大使」獎時，擊敗最大對手黃心穎，會場可謂遍地眼鏡！據悉湯獲獎惹起不少佳麗私下非議，認為湯表現不夠好，難明她為何奪獎，且有感她與之前奪得「航空大使」獎的張名雅一樣，因是「星後代」較易獲高分所致！

「贏在觀眾畀分」

對於甩嘴照贏惹人議論，湯洛雯坦承獻唱時有甩漏：「係呀！都甩咗一、兩個字，首歌練咗一個禮拜，其實有諗過表演彈豎琴，但係好耐冇練，都係唱歌有信心啲！（點解贏？）唔知評判點計分，可能贏在觀眾畀分。」雖然獲獎為打入十強爭大獎打下強心針，但她接受訪問時仍表示就算奪得首個獎項，但一日未奪得十強入場券仍有壓力，還擔心被淘汰！

港姐大起底

爆料熱線：3600 1022

爆料傳真：3600 1000

爆料email： entertainment@opg.com.hk