神獸天使白雲34E的煩惱

好身材女星往往成為宅男至愛，那條深長事業線可說是搵銀武器，有人說大胸女星搵錢易，但其實她們卻有數不盡的煩惱。擁有E級導彈身材的神獸天使白雲的確受盡宅男歡迎，但讀書時期為免遭女同學妒忌，必須讓豐滿身材保持神秘，大熱天時長袖冷衫不離身，真是有苦自知……

工作是非

一到夏天，宅男必定大飽眼福，女星事業線及長腿紛紛出動，除o靚模騷惹火身材外，近期Hit爆的神獸天使亦逼爆公仔箱，其中「講唔猿」白雲的E級導彈身材早已睇到宅男流鼻血，加上她早前被指與監製錢國偉（Wilson）疑似爆房及餵雪糕，介入對方與陳宛蔚的感情後，但白雲大嘆無辜︰「有少少難受，當時仲有其他人，呢啲係假嘅，我只係入咗去兩三分鐘，我係同其他女仔一齊瞓！」

言語間白雲不時強調與Wilson「冇嘢」，雖然劃清界線，但不忘感謝對方帶她入行︰「呢件事我好無奈，完咗《五覺大戰》再冇跟佢做嘢！大家冇再聯絡，但佢帶我入行，好多謝佢。」她亦坦言承受不少壓力︰「我擔心會有人話我咁樣係博上位，做小動作換知名度，但我唔係，而咁樣唔多唔少都會令我有壓力。」說時她狀甚委屈，同時又大爆曾被指耍大牌︰「之前我喺化妝間唔出聲，有一個化妝師見到，就同其他人講話我冇笑容，扮大牌，我聽到後真係幾難受。」

封胸少女

撇除感情瓜葛，畢竟最多宅男留意就是她的E級導彈，白雲笑言有身材唔怕騷︰「我唔介意行性感，好似我鍾意拍戲，只要個角色有得發揮演技，唔介意着咩衫，但我唔會露三點！」她自爆平日行街會被途人「人肉掃描」︰「平時出街都畀人勁望，搭港鐵嗰時好多人都會望住我個胸，其實都有少少尷尬，不過依家都慣。」

說到豐滿身材，白雲亦因此煩惱過，讀書時期更要包到冚返學︰「我14歲啱啱發育已經係咁樣，我喺天津唔覺得自己大胸，好多人都係咁樣。之後我嚟香港讀中學，擔心被同學歧視身材咁勁，怕佢哋拎我身材比較，所以喺香港讀4年中學日日都着住件冷衫，30幾度都照着，其實真係好辛苦。」

為保持神秘，這種包到冚的怪異行為，加上剛來港不懂說廣東話，導致白雲被同學杯葛，即使有同學問她為何冷衫不離身，她亦有口難言︰「當時真係好唔開心，身邊啲女仔會覺得我好怪，嗰時唔知原來男仔係鍾意咁好身材嘅！我到畢業先知呢樣唔係衰嘢！」

愛情

雖然讀書時被杯葛，但白雲中學時期正是情竇初開之時，她當然亦有跟男同學談戀愛，不過讀中學的4年裏，拍的兩次拖只是幾個月貨仔︰「因為大家唔夾，我係需要人照顧嘅人，自己唔識照顧自己同好嗲嘅女仔，但佢哋都細過我，性格好小朋友，所以拍咗唔係好耐就分手。」

談到現時的感情狀況，她坦言有一個30出頭的男友︰「我鍾意大過自己嘅男仔，10年內都OK反而唔鍾意男仔好幼稚。有人問我會唔會鍾意Wilson，話佢好識照顧女仔，我就話『成班女仔同佢好似一家人，而且我男友都識佢，唔會有可能！』」

家人

跟不少年輕人一樣，白雲自小恨入娛樂圈，一般家庭的父母多數不會鼓助兒女進入娛樂圈，但白雲卻得到家人無限量支持︰「屋企都知我鍾意做娛樂圈，佢哋好支持我，我嚟香港最親就係姑姐，佢覺得性感好正常，外國好多明星都性感啦！」

反而與Wilson的緋聞，姑姐則有訓話︰「嗰件事姑姐有鬧我，佢話唔應該做呢啲事，雖然屋企人都知道係假，但會覺得咁樣係影響咗我名聲，姑姐當時好心痛好擔心我，佢明白娛樂圈就係咁，但都有叫我唔好為咗出位乜嘢都做，我亦都會將呢句說話記喺心！」

後記

雖然白雲只得24歲，但戀愛經驗相當豐富，追求愛情的她更自爆12歲已經初戀︰「我好細個已經初戀，當時我喺天津只係12歲，同個男仔只係Puppy Love，拍咗唔係好耐就分手，我之後都有繼續拍拖。」但說到戀愛次數，她似是多到不記得，看來她才是戀愛專家呢！