Robynn & Kendy扲荷包「萬」歲

女子組合Robynn & Kendy早前推出的處女專輯叫好又叫座，火速登上多個銷量榜冠軍。二人日前到唱片店各自購買8張碟攞好意頭，更打算花5位數字請客，慰勞一班出心出力的同事。

環球力捧的新進女子組合Robynn & Kendy，上月中推出首張唱片，短短一星期已有金唱片銷量，更登上多個唱片銷量榜冠軍。二人日前抽空到唱片舖視察銷情，期間被一男一女途人認出，更上前要求合照，二人亦有求必應，女途人即大讚：「我有買你哋隻碟，真係好好聽，要加油同努力！」氹到她們哈哈大笑。

買碟攞好意頭

其後，二人到唱片舖捧自己場，各自掃走8張專輯，Kendy說：「始終第一次出碟，想攞個好意頭！」而手執兩張「大牛」的Robynn則說：「希望可以發發發落去！」對於新碟銷量報捷，二人坦言喜出望外，並視為一支強心針，至於會否慶功，Robynn說：「要請Band同唱片公司同事食飯，知佢哋辛苦。（任食？）我哋準備咗5位數埋單。」不過談及年底的音樂頒獎禮，二人沒有抱太大期望：「有獎固然係好，但唔想以呢啲為目標，最緊要係我哋嘅音樂有進步。」

拍拖一定公開

感情生活方面，二人不約而同感到Dry爆，Robynn說：「我一向都唔多人追！」拍檔Kendy即搞Gag說：「畀狗追得多？」Robynn表示若真命天子出現，亦暫不會發展：「以事業為重，加上仲係新人。（地下情？）有咩好瞞？拍拖必定公開！」