王浩信演飛虎隊:好似有抑鬱症!

王浩信身形高大、擁有俊朗面孔,一拍劇便不時被派演公子哥兒、有錢仔角色,不過在現正播出的劇集《飛虎》中,他卻飾演一名懦弱的飛虎隊員,可說是一項大挑戰!他說:「呢個角色我攞咗以前冇自信嘅自己代入,嗰陣出咗兩張唱碟之後事業停滯不前,有段時間我好似有抑鬱症咁,成日以為人哋圍埋講自己,匿埋喺屋企,之後喺以前嘅經理人介紹下我入咗無綫,慢慢開始拍劇。」

提到在劇集《名媛望族》中演有錢仔,問到多次飾演此類角色會否生厭?他說:「唔抗拒,有錢仔角色都有唔同發揮,不過自己會從生活改變,變得Man啲。」問到已為人父壓力會否更大?他說:「責任大咗,但可以成為推動力,令自己更積極。(個女遺傳你啲咩?)有少少野蠻!最怕個女遺傳咗我嘅反叛,我依家都好反叛,希望可以改!」

外形高大的王浩信,一劇接一劇。