陳華鑫有高層撐欽點復活

今屆港姐玩完淘汰又玩翻叮，於倫敦慘遭叮出局的陳華鑫與「浴照佳麗」鍾麗有望憑復活戰翻生入決賽。據知，無綫高層對陳華鑫睇高一線，復活機會極高！

無綫為搶救近年每況愈下的「港姐」收視，今屆決定大革新，學外國電視台般搞真人騷，試圖製造話題吸睛。16名候選佳麗上月興致勃勃飛抵英國拍外景，豈料大會臨時宣布要眾女互選「最應被Foul佳麗」，結果外形不俗的陳華鑫及與男友「浴照」流出的鍾麗慘成炮灰，執包袱打道回港。兩女均面燶燶表示不滿，無綫更被炮轟殘忍，藉此大收宣傳之效！

玩完淘汰賽，無綫密鑼緊鼓推出第二波，本報早前率先披露大會密謀搞「復活戰」，希望翻叮陳華鑫及鍾麗。據知，「復活戰」將於月中舉行，並製作成特別節目播出，但「翻叮者」只有陳華鑫及鍾麗，屆時可能只會翻叮其中一個，亦有可能兩個都翻叮成功！

讚有演藝潛質

不過，大會事前會先於港姐官網收集意見，再給予評判作為參考，故有指鍾麗的翻叮成數不高，除了因與男友的「浴照」曝光外，曾喪插無綫亦是另一誘因；反觀陳華鑫則被睇高一線，有傳她被叮走全因部分海外佳麗希望「汰強留弱」，夾手夾腳踢她出局！為免流失高質素參賽者，無綫早有後着，藉「復活」之名作拯救，據知無綫高層睇中陳華鑫有演藝潛質，看來「得寵」的她復活機會極高！

其實陳華鑫參賽以來，先於面試被踢走，後來因有佳麗退選而頂上，再於英國被其他佳麗叮走，若然今次復活失敗，堪稱史上首位「三叮」港姐！她接受電話訪問時表示曾聽聞復活戰，但仍未確定真偽：「如果有咁嘅機會都想嘗試，對娛樂圈有興趣，睇吓有冇機會！（怕成為『三叮』港姐？）唔諗得咁多！」她表示不會發動攻勢叫粉絲在網上留言，提到有指因被捧成「熱門」而被其他佳麗踢出局，她笑說：「可能呢個都係部分原因嚟o架！」

不過，大會於月底再有淘汰戰，只有十位佳麗可獲選前往蘇梅島，兩人就算成功「復活」後，仍要經過一番「蹂躪」方能進入決賽！