丁子峻狗狗得寵做「小三」
移居上海的丁子峻在當地落地生根，七年前與太太（當時女友）在寵物店買下愛犬Joey，自此組成幸福的「一家三口」。由於工作關係，子峻經常外出公幹，但手機存放着Joey的趣怪相，以解「相思之苦」。談到與Joey結緣，子峻說：「當時我好鍾意睇電視劇《Friends》，就將其中一個角色名畀咗佢，抱起佢又有陣飯香味，所以又改咗個中文名叫『丁飯香』。試過帶佢去中心玩狗Wakeboard，玩幾次佢就上手喇！」
子峻不諱言有時會交由狗酒店照顧Joey的起居飲食，Joey漸漸成為該處的VIP，有時更幫手招待客人：「佢好受歡迎，有人會攞手機偷影佢放上網，試過有人搵佢拍廣告，但因為我太忙唔能夠帶佢跑通告，所以推咗！」由於早已「家有一寶」，子峻不急於「生BB」：「佢叻到同我老婆爭寵，只要我返到屋企，佢就會冷落我太太，聰明到知道邊個先係一家之主！」
子峻自爆平日出埠會透過視像與Joey保持聯絡。