羅力威400萬裝身谷碟

歌手羅力威加盟英皇後推出首張個人專輯，獲公司斥資於酒店舉行發布會，英皇高層吳雨更連同一眾傳媒高層撐場，羅力威戴上老闆借出價值四百萬元的鑽飾，集萬千寵愛於一身。

創作歌手羅力威（Adason）自被英皇收歸旗下後，迅即成為公司新寵，昨日獲安排在尖沙咀一間酒店舉行新專輯發布會。唱片公司高層吳雨和陳志雲等親自到場支持，師姐鍾欣桐（阿嬌）神秘現身撐場，而古巨基、容祖兒和蔡卓妍等亦拍攝短片祝賀，向小師弟送上鼓勵及祝福。

吳雨送百威圖

Adason在活動上以擅長的鋼琴大騷才藝，先和一位拉小提琴的小女孩互相Jam歌，再自彈自唱新專輯的作品，盡顯音樂才華。吳雨送上「百威圖」，並打趣說：「連胡錦濤都嚟賀你，頭先陳志雲仲話要同你上堂，兼整個志雲飯局你歎！」

Adason戴上老闆借出價值逾四百萬元的鑽飾，閃爆全場。對於老闆的愛錫，他說：「成世人最貴係今次，真係好感激老闆，對我係最大嘅鼓勵。」而唱片監製舒文則大爆Adason為人大膽，對此Adason說：「我唔講嘢係Cool，但一講嘢就覺得自己其實係活潑嘅人。」問到緋聞女友羽翹可有同感？他笑說：「冇呀！佢冇讚啲咩，唔知佢點諗。」