朱玲玲怕惹麻煩封嘴

霍震霆與朱玲玲的長子霍啟剛與跳水公主郭晶晶將拉埋天窗，本報早前獨家踢爆二人婚期為11月11日。昨日朱玲玲、霍震霆及霍啟剛分別出席活動，三人有默契地拒談婚事，不過朱玲玲被問到1111的婚期時則不置可否，似是默認！

朱玲玲昨日以永遠榮譽會長身份出席慧妍雅集步行籌款活動，期間被問到「剛晶」婚禮籌備進展？她表示二人正忙於辦理婚事，並不時詢問她的意見。至於婚期是否本報所指的11月11日？她沒有否認，並說：「No Comment，我希望由佢哋自己宣布，上次我講佢哋會喺今年結婚，原來我係第一次講出嚟，搞到佢哋都有啲煩咗，有記者喺佢屋企外面等佢，係我害咗佢哋。（佢哋叫你唔好講？）冇，不過上次搞到佢哋唔係好方便，我要負責任。」

唔心急抱孫

問到未來親家可有來港傾婚事？她表示在香港沒有，但在北京時大家有商討過。對於有指晶晶來港時住在她的家？她則否認其事，但笑言無任歡迎，並打趣說：「佢係住喺我度我都唔敢認，唔係就會有記者嚟我屋企出面等。（晶晶依家喺唔喺香港？）都係唔好講。」

她又指婚禮會於香港及北京兩地舉行，問到可恨抱孫？她笑說：「我唔急，佢哋自己決定，我咩時候都會Enjoy。」她稱很喜歡小朋友，很樂意跟他們分享自己的經驗。

此外，準新郎霍啟剛及父親霍震霆昨日在迪士尼出席活動時，同樣被記者追問婚禮事宜，啟剛只說：「今日唔答私人嘢！」而霍震霆則一貫帶記者遊花園：「年輕人嘅嘢年輕人答番啦！（準備咗禮物畀佢哋未？）多謝你哋提醒我，提我去買。」全程笑笑口，難掩興奮！