27歲鄧穎芝大方愛小心栽

現年27歲的歌手鄧穎芝，與年輕3歲的「巨聲一幫」林師傑爆出姊弟戀，她坦言為免生摩擦，拍拖時公事免談！她欣賞男友具上進心，又坦言公開戀情後毋須閃縮，愛得大方，讓情苗慢慢栽種！

感情篇：

入行8年的鄧穎芝（Vangie），自與過氣緋聞男友EO2的Eric「分手」後鮮有緋聞，惟她卻「唔聲唔聲」與林師傑（Auston）暗撻幾個月！早前兩人被本報拍得甜蜜嗒糖水，令姊弟戀曝光！不少藝人愛得低調，惟Vangie卻不介意戀情曝光：「之前都擔心公開咗戀情唔知會點，不過原來藝人拍拖都冇乜嘢，唔使閃縮，粉絲都好支持我哋！」

只談情 不傾公事

不過，思想成熟的Vangie坦言，拍拖時少談公事：「我哋會盡量避免Judge（批判）大家嘅工作，減少畀意見！若然工作上有唔開心，大家會不吐不快，互相安慰同鼓勵！」兩人出街拍拖時不會刻意避忌，但少不免會被途人認出，Vangie笑說：「啲人認得佢多過認得我，佢個人比較Social，我雖然都有人認得，但同時亦有人認錯，以前試過認錯我係鄭融，剪短頭髮後試過認錯做鍾舒漫！」

Vangie對戀情充滿信心，又大讚男友處事成熟兼有上進心，她冧爆說：「我哋有共同興趣，都鍾意唱歌同睇戲！」她早前半裸為攝影師好友擔任Model，問到拍拖後會否收起性感或向男友「備案」？她笑說：「唔使啦！其實佢藝術感幾強，呢方面冇問題！（一齊影情侶相？）若然係有意思或為慈善都可以考慮，特登去影就唔會！」

想閃婚 已見家長

正如Vangie所言，3年後她便30歲，Auston屆時才27歲，這是不爭的事實：「到我30歲時，佢仲係27歲，係有啲尷尬，始終呢個歲數仲係佢搏殺期！（心急嫁人？）依家好多人遲婚，冇所謂嘅！（閃婚？）有講過，不過我希望佢集中工作上。（事業愛情得意？）OK啦！要知足嘅。（見過雙方家長？）見過！」

事業篇：

Vangie坦言已入行8年，仍在樂壇默默耕耘，她說：「8年話長唔長、話短唔短，個位係有啲尷尬，唔係好紅，但又未至於冇人識！依家心態係要慢工出細貨，亦希望可以用自己少少知名度同Connection，幫家人或朋友做啲嘢，好似我之前幫人做Stylist，幾有滿足感，因為本身對時裝好有興趣。」

苦堅持 戀棧樂壇

對於被外界指死心不息地「戀棧樂壇」，Vangie說：「睇化咗！每個人都有佢哋自己喜歡嘅嘢，呢個世界唔會所有人都鍾意自己，我覺得自己EQ高咗！」對於被指是「有錢女」，根本不愁工作，她伸冤：「我屋企係小康之家，家人好錫我，我有自己傾內地登台，唔係攤大手板問家人攞錢！好多時有苦自己知，其實娛樂圈每月收入唔穩定，都曾經掙扎會唔會轉行！」她曾自資60萬元出碟，雖然預了蝕錢，但起碼出了一張她認為滿意的專輯，總算圓了心願。

後記：告別臭脾氣

Vangie坦言入行頭兩、三年性格極有問題，容易發脾氣及黑面，又對助手態度欠佳，嚇走了助手！她說：「依家諗番起，自己算好彩，可以同番以前髮型師及助手做朋友，佢哋都會同我講我以前嘅問題，我覺得唔好意思！」