湯洛雯谷氣趕住下火

14位候選港姐昨日返港，「是非雙嬌」湯洛雯與李渼琦人前扮冇嘢，揚言冰釋前嫌，卻被發現飛奔買飲品「下火」，明顯怒氣未消！

佳麗昨日由倫敦返抵香港機場影大合照，大會識做地為風頭人物湯洛雯及李渼琦築起十人組成的 「緩衝區」，將佳麗不和傳聞降溫！其後記者要求湯洛雯、李渼琦、尤蔭蔭及陳潔玲四人合照，各人表面順應要求，卻貌合神離擠出笑容，完成指定動作後更即時散水。不過，合照時，湯洛雯及陳潔玲即施展變臉絕技有講有笑，明顯之前是交戲。

湯洛雯雖然戴上眼鏡，但難掩倦容：「冇再喊，同李渼琦冇嘢，有傾番偈，佢話冇講過我蝦佢，可能佢中文唔好表達錯咗！」她直認壓力大，但不會退選：「開始咗唔想咁易放棄。」而被指爛賭的陳潔玲承認開設被踢爆的會員帳號，但否認爛賭：「我好憎人賭錢，個Account係畀朋友用，我連密碼都唔記得。」她承認去過澳門拜神及去賭場，很怕輸錢。她又透露曾因家人賭錢致家無寧日，亦因舊男友賭錢而分手。

李渼琦住豪宅

佳麗接受訪問後各自回家，其中「煎釀三寶」糖黐豆買嘢飲，湯洛雯飛奔買「下火」飲品，啱晒谷住一肚氣的她！另一邊廂，尤蔭蔭大前日才孖住李渼琦爆大鑊，昨日卻撇下「好姊妹」，聯同卞曉帆及王舒銳搭的士走。被賣甩的李渼琦只好愁爆傾電話，及後由一男一女接載返回窩打老道豪宅休息。