金剛張嘉兒猜情尋

有人說，娛樂圈沒追不到的男孩女孩，只有不肯去追的膽小鬼。金剛和張嘉兒這對過氣緋聞情侶在情路上分道揚鑣，金剛深信其靚仔外表型到不行，打算投向阿美利堅美媚懷抱；嘉兒則選擇隱惡揚善，把The Best一面展示給心儀對象。為甚麼？因為他們都喜歡談戀愛。

為何女士一定要30歲前結婚？單身女性就要怕「攝灶罅」？就連電視節目也要由外至內改造盛女，教授冧仔秘技。原因無他，This City Is Dying！

港女唔怕做

現年28歲的張嘉兒並非愛情專家，在這扭曲社會眼裏更即將成為「中女」，她卻不怕成為「剩女」，皆因人生一樣能活得精彩：「以前嘅年代30歲前就要結婚，其實30歲仲有好多嘢可以做！雖然好期待有幸福家庭，但唔需要急，自由身都可以好好享受，想去旅行就去，唔使同咁多人交代！」變成剩女的其中一個原因是「港女」性格，嘉兒卻為「港女」而自豪：「我喺溫哥華長大，但係有『港女』嘅優點，例如獨立、擁有事業。有啲人覺得『港女』拜金，我就唔覺，因為我都慳儉！」

嘉兒面對心儀男生時，會浮游於出擊與等待之間：「我會對佢展示得人鍾意嘅一面，同埋畀佢覺得我係個開心嘅女仔！冇人鍾意愁眉苦臉嘅人，如果吸引到對方就可以發展，吸引唔到就冇緣分啦！」但作為新世代女性的她不會盲目等待，苦苦相戀更不是其作風：「通常鍾意得就可以好快一齊，愛情唔應該係好辛苦咁爭取返嚟！我相信一見鍾情，所以鍾意得就應該會有Feel！」

曾被鹹豬手

對自己有要求的嘉兒，對於伴侶同樣有要求，對陽光男孩情有獨鍾的她，認為健康、運動型的男生相當吸引！但她不喜歡「扮定性」的男生：「如果男仔對感情唔太認真，但係扮到好認真，我就覺得好反感！我接受人哋拍散拖，但接受唔到明明想拍散拖，但係扮到好認真囉！」

早前爆出女藝人被強姦風波，嘉兒對此非常警惕：「唔熟嘅人就唔好同佢出去，就算出去都要搵人陪！」不過原來她初入行時亦曾遭「鹹豬手」拍Pat Pat，她說：「當時好多人在場，但因為自己仲好新，唔識點應對，所以立即黐番女仔玩，以後對嗰個人都有避忌同防範！」

後記：聞「舊愛」落閘

對於與金剛的關係，嘉兒坦言已傳緋聞傳到厭，小記打趣問她：「如果金剛追你，你會唔會接受？」她沒好氣地說：「我哋只係撻得着友誼的火花，撻唔着愛情嘅火花！」

原名李信樵的金剛，是公仔箱的奇葩，真人演繹廣東話不純正都可以殺出一條血路。來港發展兩年，一年一樁緋聞不算多，但拜倒在他光頭與鬍鬚下的女生，聞說有好幾打，實在不得不向他寫個服字。

到底金剛為何不費吹灰之力就能顛倒眾女？二字記之曰「靚仔」，講起自己有多型，他即時眉飛色舞：「我不嬲靚齋（仔）！唔係我話嘅，係媽咪話，由細到大，我嘟（都）係咁型，唔係講笑喎！你睇我又光頭又有鬚，真害（係）好得噃！拍過八次十次拖，個個女朋友都話我靚囉！」明晒！

追女靠細心

莫非金剛只靠靚仔行走江湖？錯哉，要在追女戰場上決勝千里，要靚在內形諸外，才能立於不敗之地，他說：「單靠靚齋（仔）單（當）然未夠啦，我份人仲巧（好）細心呀！」他邊說邊幫小記斟茶，作為堂堂男子漢的小記，也被他的細心融化，金剛說：「哎呀！講起細心自己都怕醜，我接女朋友放工，一定會買定嘢食同嘢飲比佢，冬天天氣巧（好）凍，我一係捽暖隻手，一係戴手襪，拖佢嗰時茆（冇）咁凍囉！仲有呀，有時食飯用木筷子，我益殿（一定）抆晒筷子啲木屑，你知啦，食咗好容易劖親口，個個女友都話我細心！」

既然細心又靚仔，何解金剛來港至今仍未有着落？張嘉兒也好，小儀也好，「神獸」蔡慧欣也罷，金剛沒有一個肯認頭，為甚麼？怕醜囉，你不信？他說：「其實我真係好少出去玩，都未同過香港女仔拍拖呀，之前全部台灣人。嘉兒係Friend，小儀都係，另外嗰個……都係朋友。我係嚟香港工作，要玩（搵）錢呀，同工作拍拖好過啦！都害（係）嗰句，我咁靚仔，好浪費囉！」

I Love洋妞

浪費那就出擊吧！世上不是沒有追不到的女孩嗎？原來金剛心中的女神遠至阿美利堅：「我女朋友一定要令（靚）女，要好令（靚）嗰隻！最鍾意外國女仔，美瑾霍絲（Megan Fox）正呀，真係好想追佢囉！可惜吖，我英文唔係咁好，唔知點同佢鳩（溝）通，畀我幾年時間呀，一定學好英文，娶個白白嘅外國美媚返嚟呀！呵呵！」

畢竟金剛已31歲，難道母親沒催婚？不是說要追到美瑾霍絲，她就會出現在你眼前，金剛說：「媽媽冇催我呀！我知佢都想飲新抱茶，如果追到下一個女仔，一定娶佢做老婆！」聽住先，不是常說「靚仔冇本心」嗎？

後記：老中青通殺

小記與金剛在訪問中侃侃而談「把妹經」，突然手機鈴聲響起，原來小記母親來電，當她知道金剛在旁時說：「金剛？好靚仔呀！」金剛即搶過電話說：「Auntie，我都知我靚齋（仔），畀個簽名你！」媽媽當堂暈倒，金剛，你係得嘅，把盡老中青！