鄭融遭攬腰錫面嚇到傻笑

歌手鄭融前晚出席活動時被熱情攝影師Mick當眾攬腰及錫面，被嚇得以笑掩飾尷尬的她，死撐是老外禮儀！

鄭融、「警鐘胸模」Jessica C.（JC）、名模Jocelyn及丈夫Anthony等前晚出席英國搖滾攝影師Mick Rock的攝影展活動。鄭融甫到場即獲Mick熱情款待，Mick先搭着她膊頭合照，當她想離開之際，Mick即熱情攬腰又錫面珠，只見她以笑來掩飾尷尬！

事後問鄭融可有被嚇親？她死撐：「西方人一般禮儀！（佢攬你腰？）西方人接觸時都會！（因你男友係外國人，已習慣？）唔同！西方人或自己人一樣，冇話邊個熱情啲！」她堅稱面紅是因為見到攝影大師很高興。問到可遇過更熱情的人？她說：「冇，我識得保護自己，我會隨機應變，總之佢好友善！」

JC大方祝福Dan

另一邊廂，對於有指緋聞男友Dan有新戀情，JC表示有留意報道：「我哋冇拍拖，Work Out唔到！佢係一個好男人，不過唔係我嘅Mr. Right！」她更戥對方有新戀情高興，但自言沒時間拍拖：「我有好多嘢學，專注工作！（有冇人追？）係有好男仔追我，但我冇時間！（享受單身？）想畀安全感自己！」