港男北上相睇節目溝掂寸嘴作家

無綫及亞視曾炮製相睇節目甚受歡迎，內地亦有類似節目《非誠勿擾》，最近更締造一段中港良緣！港男鍾兆倫與「翻版楊冪」80後女作家吳瑜，亦因參加節目而成功譜戀曲！

近年不少港男返內地覓真愛，締造中港情緣，雖然香港「剩女」多，偏偏港男不愛港女，反而轉往神州大地搵另一半！40歲港男鍾兆倫（Joeson），早前參加江蘇衞視的人氣相睇節目《非誠勿擾》，睇中過去半年不斷在節目中寸走示愛者的27歲內地女作家吳瑜，最後冧掂伊人，於昨晚播出的節目中更牽手成為情侶，由錄影該集至今拍拖約1個月。

苦練普通話備戰

Joeson昨日詳述參加《非》經過，他表示在節目留意吳瑜，於是上網及睇對方的微博加深了解，兼且為她學了4個月普通話，最後報名上該節目：「5月初去咗廣州面試，攝製隊嚟香港拍攝我個人生活，之後我飛咗去佢家鄉浙江，了解佢成長地方，因為中國人對家嘅觀念好重！5月上咗節目，我喺節目講出心聲同播片，結果贏得芳心同佢牽手，全場人喊晒！」

雖然與女友分隔兩地，但Joeson對戀情充滿信心，他表示靠微信及長途電話聯繫。對於女友被批評詞鋒尖酸刻薄，他講盡好話：「佢本身鍾意寫嘢，有自己一套想法，我欣賞佢嘅才華同智慧！（結婚？）會有呢個目標，仍需要時間了解，唔想有草率決定！」而吳瑜亦愛玩微博，曾上載多張大露背及Deep V性感靚女相。